அதிமுக வேட்பாளர்களில் 149 பேர் புதுமுகங்கள்.... சிட்டிங் எம்.எல்.ஏ.க்கள் 100 பேருக்கு வாய்ப்பு இல்லை

By Mathi

Published: Tuesday, April 5, 2016, 9:05 [IST]

Subscribe to Oneindia Tamil

சென்னை: அதிமுக அறிவித்துள்ள வேட்பாளர்களில் 149 பேர் புதுமுகங்கள்... தற்போதைய எம்.எல்.ஏ.க்கள் 100 பேருக்கு மீண்டும் போட்டியிட வாய்ப்பு தரப்படவில்லை.

சட்டசபை தேர்தலில் அதிமுக 227 தொகுதிகளில் தனித்து போட்டியிடுகிறது. எஞ்சிய 7 தொகுதிகளை கூட்டணி கட்சிகளுக்கு ஒதுக்கியுள்ளது. அந்த தொகுதிகளில் போட்டியிடுவோரும் அதிமுகவின் இரட்டை இலை சின்னத்திலேயே போட்டியிடுகின்றனர்.

அதிமுக வேட்பாளர் பட்டியலின் சிறப்பு அம்சங்கள்:

அ.தி.மு.க. வேட்பாளர்களில் ஏற்கனவே அமைச்சர்களாகவும், எம்.எல்.ஏ.க்களாகவும் இருக்கும் 50 பேருக்கு மீண்டும் வாய்ப்பு அளிக்கப்பட்டுள்ளது.

முன்னாள் எம்.எல்.ஏ.க்கள் 28 பேரும் வேட்பாளர்களாகியுள்ளனர்.

100க்கும் மேற்பட்ட சிட்டிங் எம்.எல்.ஏ.க்களுக்கு மீண்டும் போட்டியிட வாய்ப்பளிக்கப்படவில்லை

வேட்பாளர்களில் 149 பேர் புதுமுகங்கள்.

ஜெயலலிதா உட்பட 31 பெண்களுக்கு வாய்ப்பளிக்கப்பட்டுள்ளது.

கடந்த தேர்தலில் ராசிபுரம் தொகுதியில் போட்டியிட்ட சபாநாயகர் ப.தனபால் இந்த முறை அவினாசி தொகுதியில் இடம்மாறி போட்டியிடுகிறார்.

நத்தம் தொகுதியில் போட்டியிட்டு வெற்றி பெற்ற அமைச்சர் நத்தம் ஆர்.விஸ்வநாதன் தற்போது ஆத்தூர் தொகுதியில் போட்டியிடுகிறார்.

சாத்தூர் தொகுதியில் போட்டியிட்ட அமைச்சர் ஆர்.பி.உதயகுமார் இம் முறை திருமங்கலம் தொகுதியில் களம் இறங்குகிறார்.

2011-ம் ஆண்டு தேர்தலின்போது ஆர்.கே. நகர் தொகுதியில் போட்டியிட்ட வெற்றிவேல் இந்த முறை பெரம்பூர் தொகுதியில் போட்டியிடுகிறார்.

வில்லிவாக்கம் தொகுதியில் போட்டியிட்ட ஜே.சி.டி.பிரபாகர் இம் முறை கொளத்தூர் தொகுதியில் போட்டியிடுகிறார்.

கரூர் தொகுதியில் போட்டியிட்ட முன்னாள் அமைச்சர் வி.செந்தில் பாலாஜி தற்போது அரவக்குறிச்சி தொகுதியில் போட்டியிடுகிறார்.

கடந்த தேர்தலில் தி.மு.க. சார்பில் எழும்பூர் தொகுதியில் போட்டியிட்ட பரிதி இளம்வழுதி அதிமுகவில் சேர்ந்த நிலையில் மீண்டும் அவரே வேட்பாளராக நிறுத்தப்பட்டுள்ளார்.