நடிகர் மிதுன் சக்கரவர்த்திக்கு சொந்தமான ரிசார்ட் உள்ளிட்ட 11 கட்டிடங்களுக்கு சீல்!
நீலகிரியில் 11 காட்டேஜ்களுக்கு சீல் வைக்கப்பட்டது.
மசினகுடி: நீலகிரியில் யானைகள் வழித்தடத்தை ஆக்கிரமித்து கட்டப்பட்டிருந்த மேலும் 11 விடுதிகளுக்கு சீல் வைக்கப்பட்டது. இதில் நடிகர் மிதுன் சக்கரவர்த்திக்கு சொந்தமான ரிசார்ட்டும் ஒன்றாகும்.
ஊட்டி அருகே மசினகுடி, பொக்காபுரம், சிங்காரா, வாழைத்தோட்டம் உள்ளிட்ட பகுதிகளில் யானைகள் நடமாடக்கூடிய பகுதிகள். இங்குள்ள பட்டா நிலங்களில் வீடுகள் கட்ட அனுமதி பெற்றுவிட்டு கட்டிடங்கள் கட்டப்பட்டு உள்ளன.
உச்சநீதிமன்றம் வழக்கு
அந்த கட்டிடங்கள் பெரும்பாலும் ரிசார்ட்டுகளாக செயல்பட்டு வருகின்றன. இதனால் யானைகள் நடமாட முடியாத நிலை ஏற்பட்டு அவற்றின் இனப்பெருக்கத்திற்கும் பாதிப்பு ஏற்படுவதாக சென்னை ஐகோர்ட்டிலும் பின்னர் மேல்முறையீடாக உச்சநீதிமன்றத்திலும் வழக்கு தொடுக்கப்பட்டது.
12 விடுதிகளின் ஆவணங்கள்
இதனை விசாரித்த நீதிபதிகள் 39 விடுதிகளில் அனுமதியின்றி கட்டப்பட்ட 27 விடுதிகளுக்கு 48 மணி நேரத்தில் சீல் வைக்க வேண்டும் என்றும், மீதமுள்ள 12 விடுதிகளின் ஆவணங்களை சரிபார்த்து அனுமதி இல்லையெனில் சீல் வைக்க வேண்டும் என்றும் மாவட்ட கலெக்டர் இன்னசென்ட் திவ்யாவுக்கு உத்தரவிட்டார்.
அவகாசம் கோரினர்
அதன்படி முதற்கட்டமாக 27 தனியார் விடுதிகளுக்கு கடந்த 12-ந் தேதி சீல் வைக்கப்பட்டது. மீதமுள்ள 12 தனியார் விடுதிகளின் ஆவணங்கள் சரிபார்க்கப்பட்டன. அப்போது அந்த விடுதி உரிமையாளர்கள் எப்படியாவது தங்களதுஉரிய ஆவணங்களை தாக்கல் செய்கிறோம், அதனால் கால அவகாசம் கோரினர்.
மிதுன் சக்கரவர்த்தி
அதன்படி ஆகஸ்ட் 25-ம் தேதி வரை நேரம் கொடுக்கப்பட்டது. ஆனால் அவர்கள் ஆவணங்களை தாக்கல் செய்யவில்லை. அதனால் 12 கட்டிடங்களில் ஒன்று வீடு என்பதால் அதை தவிர மற்ற 11 காட்டேஜ்களுக்கும் இன்று சீல் வைக்கப்பட்டது. அதில் இந்தி நடிகர் மிதுன் சக்கரவர்த்திக்கு சொந்தமான மொனார்க் சப்பாரி பார்க் ரிசார்ட்டும் ஒன்று.