வேட்பாளர்களின் செலவுகளை கண்காணிக்க.. தேர்தல் பார்வையாளர்கள் இன்று தமிழகம் வருகை

சென்னை: அரசியல் கட்சிகள், வேட்பாளர்களின் செலவுகளைக் கண்காணிக்க 12 பார்வையாளர்கள் இன்று தமிழகம் வருகின்றனர். இவர்கள் சென்னை, கோவை, மதுரை ஆகிய மண்டல வாரியாகச் சென்று பணிகளை மேற்கொள்ள உள்ளதாக தமிழக தலைமை தேர்தல் அதிகாரி ராஜேஷ் லக்கானி தெரிவித்தார்.

தமிழக சட்டசபைக்கு பொதுத் தேர்தல் அடுத்த மாதம் 16-ந் தேதி நடைபெறுகிறது. வாக்குப் பதிவிற்கான அனைத்து ஏற்பாடுகளையும் தேர்தல் ஆணையம் முழுவீச்சில் செய்து வருகிறது.

இதுகுறித்து சென்னையில் தலைமைத் தேர்தல் அதிகாரி ராஜேஷ் லக்கானி செய்தியாளர்களிடம் கூறியதாவது: தமிழகத்தில் தேர்தல் பிரசாரம் முடிவடையும் மே 14-ஆம் தேதி மாலை 6 மணி முதல் செல்போன் மூலமாக மொத்தமாக குறுஞ்செய்திகளை அனுப்பத் தடை விதிக்கப்பட்டுள்ளது. மேலும், தொலைக்காட்சி, வானொலி ஆகியவற்றின் மூலமும் பிரசாரங்கள் செய்யக் கூடாது.

அரசியல் கட்சியினர், வேட்பாளர்கள் பிரசாரத்துக்காக செய்யும் செலவுகளைக் கண்காணிக்க வெளி மாநிலங்களில் இருந்து 12 செலவினப் பார்வையாளர்கள் வருகின்றனர். அதில், 9 பேர் இந்திய வருவாய்ப் பிரிவைச் சேர்ந்தவர்கள், 2 பேர் ஐ.ஏ.எஸ்., ஒருவர் ஐ.பி.எஸ்., அதிகாரியாவார். தேர்தலுக்கான வேட்புமனு தாக்கல் ஏப்ரல் 22ஆம் தேதியன்று தொடங்குகிறது. இதற்கான அறிவிக்கை வெளியிடப்பட்டவுடன், அரசின் அனைத்து நிர்வாக நடவடிக்கைகளும் தேர்தல் ஆணையத்தின் கட்டுப்பாட்டில் வரும்.

வேட்புமனுவில் தவறான தகவல் அளிப்போருக்கு சிறை தண்டனை: வேட்புமனு தாக்கலின் போது சரியான தகவல்களை மட்டுமே அளிக்க வேண்டும். இந்தத் தகவல்கள் உடனுக்குடன் சரிபார்க்கப்படும். தவறான தகவல்களை அளித்ததாகக் கண்டுபிடிக்கப்பட்டால், மக்கள் பிரதிநிதித்துவ சட்டப்படி 6 மாத சிறை தண்டனை விதிக்கப்படும்.

கூடுதலாக 380 வாக்குச் சாவடிகள் அமைப்பு: தமிழகத்தில் 65,616 வாக்குச் சாவடிகள் உள்ளன. வாக்காளர்களின் எண்ணிக்கை அதிகரித்துள்ளன. கூடுதலாக 380 வாக்குச் சாவடிகள் ஏற்படுத்தப்பட்டுள்ளன. இதுதவிர, வாக்குச் சாவடிகளின் எண்ணிக்கையை அதிகரிப்பதா என்பது குறித்து ஏப்ரல் 22ஆம் தேதி தெரியவரும்.

வாக்குப்பதிவின் போது வாக்குச்சாவடிகளில் அரசியல் கட்சிகள் சார்பில் ஏஜெண்டுகள் நியமிக்கப்பட்டிருப்பார்கள். அந்த ஏஜெண்டுகள் வாக்குப்பதிவு தினத்தன்று மதியம் 3 மணிக்கு பிறகு வாக்குச்சாவடியை விட்டு வெளியேறவோ அல்லது அவருக்கு பதில் வேறு ஒருவரை மாற்றி விட்டு செல்வதற்கோ தேர்தல் ஆணையம் அனுமதிக்காது. இவ்வாறு அவர் கூறினார்.

English summary

Tamil nadu chief electoral Officer Rajesh lakhoni said, 12 Election supervisors to visit tamilnadu on today