தேமுதிக வேட்பாளர்கள் தேர்வு: விஜயகாந்திடம் பட்டியலை ஒப்படைத்த சுதீஷ்

சென்னை: சென்னை கோயம்பேட்டில் உள்ள தேமுதிக தலைமை அலுவலகத்தில் வேட்பாளர்களை தேர்வு செய்யும் பணி இன்று நடைபெற்றது. சுதிஷ் தலைமையிலான 7 பேர் கொண்ட குழு வேட்பாளர்களை தேர்வு செய்து தலைவர் விஜயகாந்திடம் அளித்துள்ளனர். இந்த வேட்பாளர்களின் பட்டியலை விரைவில் விஜயகாந்த் வெளியிடுவார் என்று தேமுதிக வட்டார தகவல்கள் தெரிவிக்கின்றன.

சட்டசபை தேர்தலுக்கு இன்னும் 65 நாட்கள் உள்ள நிலையில் தமிழக அரசியல் களம் பரபரப்படைந்துள்ளது. 6 முனை போட்டியை சந்திப்பதால் யாருடைய வாக்கு யாருக்கு விழுமோ என்ற அச்சம் அரசியல் கட்சியினரிடையே எழுந்துள்ளது.

தேமுதிக தனித்து களம் காணப்போவதாகவும், சுதீஷ் தலைமையிலான 7 பேர் கொண்ட குழு வேட்பாளர்களை தேர்வு செய்யும் என்றும் சென்னையில் நடைபெற்ற தேமுதிக மகளிரணி மாநாட்டில் விஜயகாந்த் தெரிவித்தார். மேலும் தம்மை கூட்டணிக்கு அழைத்த அனைத்து தலைவர்களுக்கும் அவர் நன்றி தெரிவித்தார்.

தேமுதிகவில் விருப்பமனு கொடுத்தவர்களிடம் அக்கட்சியின் தலைவர் விஜயகாந்த், கடந்த மாதம் 22ம் தேதி நேர்காணலை நடத்தினார். அவர் கடந்த 1ம் தேதியுடன் நேர்காணலை முடித்தார். தேமுதிக தனித்து போட்டியிடும் என்று அறிவிக்கப்பட்டுள்ளதால் இந்த பட்டியலில் இருந்து 234 தொகுதிகளிலும் போட்டியிடும் வேட்பாளர்கள் தேர்வு செய்யப்பட உள்ளனர்.

வேட்பாளர்களை தேர்வு செய்வதற்காக கட்சியின் மாநில இளைஞரணி செயலாளர் எல்.கே. சுதீஷ் தலைமையில் அமைக்கப்பட்டுள்ள குழுவில் கட்சியின் பொருளாளர் இளங்கோவன், தலைமை நிலைய செயலாளர் எம்எல்ஏ பார்த்தசாரதி, கொள்கை பரப்பு செயலாளர் சந்திரகுமார், கட்சியின் பட்டதாரி ஆசிரியர், பேராசிரியர் அணியின் செயலாளர் ரவீந்திரன், சேலம் வடக்கு தொகுதி எம்எல்ஏ வெங்கடேசன், விழுப்புரம் மாவட்ட செயலாளர் மோகன்ராஜ் ஆகியோர் இடம்பெற்றுள்ளனர்.

இந்த குழுவினர், இன்று காலை கோயம்பேட்டில் உள்ள கட்சியின் தலைமை அலுவலகத்தில் வேட்பாளர்களை தேர்வு செய்யும் பணியை துவக்கினர். இதில், தேர்வு செய்யப்பட்ட வேட்பாளர்களின் பெயர்களை கட்சி தலைவர் விஜயகாந்திடம் ஒப்படைத்தனர்.

காஞ்சிபுரத்தில் தேர்தல் அறிக்கையை வெளியிட்ட விஜயகாந்த் இன்னும் ஓரிரு நாட்களில் வேட்பாளர் பட்டியலை அறிவிப்பார் என்று எதிர்பார்க்கலாம்.

English summary

A seven-member committee, headed by DMDK youth wing secretary L.K. Sudheesh, finalise the candidates list for all 234 constituencies.