அமைச்சர் கோகுல இந்திராவுக்கு நான்தாங்க போட்டி...- வரிந்து கட்டும் ஒரு நடிகர்!

சென்னை: அண்ணா நகர் தொகுதியில் போட்டியிடும் அமைச்சர் கோகுல இந்திராவை எதிர்த்து களமிறங்கியுள்ளார் நடிகர் குமரன்.

தைரியம் படத்தின் மூலம் நாயகனாக அறிமுகமானவர் குமரன். தொடர்ந்து வருச நாடு உள்ளிட்ட படங்களில் நடித்தார்.

இத்தனைக்கும் இவர் முன்பு அதிமுகவைச் சேர்ந்தவர்தான். கடந்த 2001 உள்ளாட்சித் தேர்தலில் சோழவரம் யூனியன் தலைவர் தேர்தலில் அதிமுக சார்பில் போட்டியிட்டு வென்றவர் குமரன். அந்தத் தேர்தலில் குறைந்த வயதில் தேர்தல் மூலம் வெற்றிப் பெற்ற முதல் வேட்பாளர் குமரன்தானாம்.

கடந்த 2003-ல் இவர் இளைஞர் மற்றும் மாணவர் கட்சி என்ற பெயரில் தனிக் கட்சியைத் தொடங்கினார்.

இப்போது 2016-ம் ஆண்டுத் தேர்தலில் அண்ணா நகர் சட்டமன்றத் தொகுதியில் போட்டியிடுகிறார். இங்குதான் அமைச்சர் கோகுல இந்திராவும் போட்டியிடுகிறார். இந்தத் தொகுதியில் மற்ற கட்சிகளின் வேட்பாளர்கள் இருந்தாலும், கோகுல இந்திராவைத்தான் தனது போட்டி வேட்பாளர் என்கிறார் குமரன்.

இவருக்கு பிரஷர் குக்கர் சின்னத்தை ஒதுக்கியுள்ளது தேர்தல் ஆணையம்.

அதுமட்டுமல்ல, தமிழகம் முழுவதும் 234 தொகுதிகளிலும் இளைஞர்கள் மற்றும் மாணவர்களை வேட்பாளர்களாகக் களமிறக்கியுள்ளாராம் குமரன்.

234 தொகுதிக்குமா... பெரிய கட்சிகளே தயங்கும் நிலையில், உங்கள் கட்சியில் அவ்வளவு வேட்பாளர்கள் இருக்கிறார்களா குமரன்?

English summary

Actor turned politician Kumaran is contesting against Minister Gokula Indira in Anna Nagar Constituency.