ரசிகர்கள் முன்னிலையில் அரசியல் திட்டத்தை நாளை அறிவிக்கிறார் ரஜினிகாந்த்! பெரும் பரபரப்பில் தமிழகம்
சென்னை: நடிகர் ரஜினிகாந்த் நாளை தனது அரசியல் பிரவேசம் குறித்து அறிவிக்கிறார்.
தமிழ் சினிமாவில் சூப்பர் ஸ்டார் என்ற அந்தஸ்துடன் உள்ளவர் ரஜினிகாந்த். இவருக்கு வயது வித்தியாசமின்றி பட்டிதொட்டியெங்கும், ரசிகர்கள் உள்ளனர். பெரியவர் முதல் குழந்தைகள் வரை இவரது நடிப்பு மற்றும் ஸ்டைலுக்கு ரசிகர்கள்.
திரைப்படங்களில் மட்டுமின்றி அவ்வப்போது பொது வெளியிலும் அரசியல் கருத்துக்களை கூறியவர் ரஜினிகாந்த்.
அரசியல் எதிர்பார்ப்பு
ரஜினிகாந்த்தின் இந்த நடவடிக்கைகளால் அவர் அரசியலில் ஈடுபட போகிறார் என்ற பேச்சு 1990கள் முதலே இருந்தது. ஆனால் ரஜினிகாந்த் இதுவரையில் அந்த விஷயத்தில் பிடிகொடுக்கவேயில்லை. நடிப்பு மற்றும் ஆன்மீகம் ஆகிய இரண்டையும் மட்டும் இரு கண்களாக பாவித்து வருகிறார் ரஜினிகாந்த்.
ரஜினிகாந்த் அறிவிப்பு
இந்த நிலையில், ரஜினிகாந்த் நடிப்பு துறையில் இருந்து ஓரளவுக்கு விலகி, அரசியலில் இறங்க உள்ளதாக இப்போது தகவல்கள் வெளியாகியுள்ளன. சென்னையில், கடந்த 5 நாட்களாக ரசிகர்களை சந்தித்து வருகிறார் ரஜினிகாந்த். டிசம்பர் 31ம் தேதி தனது அரசியல் திட்டத்தை வெளியிடப்போவதாகவும் அவர் தெரிவித்து உள்ளார்.
நாளை அறிவிப்பு
நாளை காலை 8.30 மணியளவில் கோடம்பாக்கம் ராகவேந்திரா திருமண மண்டபத்தில் 6வது நாளாக ரசிகர்களை சந்திக்கிறார் ரஜினி. அப்போது அவர்களுடன் புகைப்படம் எடுத்துக்கொள்கிறார். நண்பகல் நேரத்தில், அவர் ரசிகர்களுடனான சந்திப்பை நிறைவு செய்துவிட்டு, ரசிகர்கள் முன்னிலையிலேயே தனது அரசியல் பிரவேசம் குறித்து அறிவிக்க உள்ளார்.
அரசியல் வடிவம்
ரஜினியின் அரசியல் பிரவேசம் எப்படியான வடிவுடையதாக இருக்கும் என்பது ரகசியமாக வைக்கப்பட்டுள்ளது. நாளைதான் அது வெளியாகும். இந்த தகவல்களால் அரசியல் வட்டாரத்தில் பெரும் பரபரப்பு நிலவுகிறது. ஊடகங்களும் நாளைய ரஜினி அறிவிப்பு செய்தியை உடனுக்குடன் வழங்க ஆயத்தமாகி வருகின்றன. ரஜினி ரசிகர்கள் ஆவலோடு காத்திருக்கும் அந்த அறிவிப்பு நாளை வெளியாவதால் தமிழகம் முழுக்க ரஜினி ரசிகர்கள் நடுவே இதுவே இப்போது பேசுபொருளாகியுள்ளது.
Click it and Unblock the Notifications
Sign in with Google