சுட்டெரிக்கும் "சூரியன்"... பக்தர்கள் வசதிக்காக ஸ்ரீரங்கம் கோவிலில் தரை விரிப்புகள்

ஸ்ரீரங்கம்: ஸ்ரீரங்கம் கோவிலில் பக்தர்களின் வசதிக்காக தரை விரிப்புகள் விரிக்கப்பட்டுள்ளன.

அதிமுக பொதுச்செயலாளரும், தமிழக முதல்வருமான ஜெயலலிதாவின் நெருங்கிய தோழி சசிகலா. இவர் ஜெயலலிதாவின் வெற்றிக்காக சமீபகாலமாக கோவில் கோவிலாகச் சென்று சிறப்பு வழிபாடு நடத்தி வருகிறார்.

அந்தவகையில், சமீபத்தில் சசிகலா ஸ்ரீரங்கம் கோவிலுக்கு சென்றிருந்தார். மதிய வேளையில் அவர் கோவிலுக்கு சென்றதால், காலில் செருப்பில்லாமல் கோவில் பிரகாரங்களில் சுற்றி வர இயலாமல், சசிகலா மிகவும் தவித்தார்.

இதனால், கோவில் இணை ஆணையர் கோவில் பணியாட்டகளை் துணையோடு சசிகலா கோவிலினுள் செல்லும் இடங்களில் எல்லாம் தரை விரிப்புகளை விரித்து வைத்தனர்.

இது மற்ற பக்தர்களை முகம் சுளிக்க வைத்தது. மற்ற பக்தர்கள் அனைவரும் கொளுத்தும் வெயிலில் நடக்க முடியாமல் அல்லாடிக் கொண்டிருக்க, அவர்களைக் கண்டு கொள்ளாத கோவில் நிர்வாகம், சசிகலாவிற்கு மட்டும் தரை விரிப்பு விரித்ததை அவர்கள் விமர்சித்தனர்.

பூலோக வைகுண்டம், 108 திவ்ய தேசங்களில் முதன்மையானது என போற்றப்படும் ஸ்ரீரங்கம் ரெங்கநாதர் கோவிலில் ஆண்டு முழுவதும் பல்வேறு விழாக்கள், உற்சவங்கள், நம்பெருமாள் புறப்பாடு என பல நிகழ்ச்சிகள் நடத்தப்பட்டு வருகின்றன. இதில் கலந்து கொண்டு சாமி தரிசனம் செய்வதற்காக உலகின் பல்வேறு இடங்களில் இருந்து தினமும் பக்தர்கள் வந்து செல்கின்றனர்.

இது தவிர கோவிலில் உள்ள சிற்பங்கள், கலை வேலைப்பாடுகளை பார்ப்பதற்காக சுற்றுலா பயணிகளும் அதிக அளவில் வருகிறார்கள்.

இப்படியாக கோவிலுக்கு வருபவர்கள் அனைவரும் கோடைக்காலத்தில் பகல் நேரத்தில் கோவில் வளாகத்தினுள் கால் வைக்க முடியாமல் வெயிலால் அவதிப்படுகின்றனர்.

இந்நிலையில், தற்போது ஸ்ரீரங்கம் ரெங்கநாதர் கோவில் வளாக நடைபாதைகளில் கோடை வெயிலை சமாளித்து பக்தர்கள் நடந்து செல்வதற்கு வசதியாக ரூ.2.5 லட்சம் மதிப்பிளான தரை விரிப்புகள் புதிதாக போடப்பட்டுள்ளன.

இவை கோவில் வளாகம் முழுவதும் சுமார் 650 சதுர மீட்டர் பரப்பளவில் விரிக்கப்பட்டுள்ளன. சுமார் 4 அடி அகலம் கொண்ட இந்த தரை விரிப்புகள் தேங்காய் நாரினால் தயாரிக்கப்பட்டவை ஆகும்.

கோவில் வளாகத்தினுள் திறந்த வெளியில் போடப்பட்டுள்ள இந்த தரை விரிப்புகள், காலில் சூடு ஏற்படாமல் நடந்து செல்ல மிகவும் உதவியாக இருப்பதாக பக்தர்கள் மகிழ்ச்சி தெரிவித்து உள்ளனர்.

English summary

The Hindu endowment board has done additional facilities for pilgrims in Srirangam temple.