அதிமுக அம்மா அணி துணைப் பொதுச்செயலாளர் டி.டி.வி தினகரனுக்கு 'வைரஸ்' காய்ச்சல்
சென்னை : அதிமுக அம்மா அணி துணைப் பொதுச்செயலாளர் டி.டி.வி தினகரன் வைரஸ் காய்ச்சலால் அவதிப்பட்டு வருகிறார். அவரை ஓய்வில் இருக்க மருத்துவர்கள் பரிந்துரை செய்துள்ளனர்.
தமிழகத்தில் டெங்கு காய்ச்சல் பாதிப்பு அதிக அளவில் இருக்கிறது. கடந்த இரண்டு வாரங்களில் மட்டும் தமிழகம் முழுவதும் நூற்றுக்கும் மேற்ப்பட்டோர் டெங்குவால் இறந்துள்ளனர்.
இதில் மாநில அரசு மெத்தனமாக நடந்து கொள்வதாக அரசியல் தலைவர்கள் குற்றம்சாட்டி வருகிறார்கள். தற்போது தமிழக அரசியலில் பரபரப்பான விஷயமாகி இருக்கிறது டெங்கு.
இந்நிலையில் அதிமுக அம்மா அணி துணைப் பொதுச்செயலாளர் தினகரன் வைரஸ் காய்ச்சலால் அவதிப்பட்டு வருகிறார் என தகவல் வெளியாகி உள்ளது. நான்கு நாட்களாக காய்ச்சல் பாதிப்பு அவருக்கு இருக்கிறது.
டெங்கு குறித்தான பரிசோதனைகள் செய்து பார்த்ததில், சாதாரண வைரஸ் காய்ச்சல் என்று தெரிய வந்திருக்கிறது. இதனால் மருத்துவர்கள் அவரை ஓய்வில் இருக்கச் சொல்லி இருக்கிறார்கள்.
இதுபோல, கடந்த பத்து நாட்களுக்கு முன் சசிகலா தம்பி திவாகரன் டெங்குவால் பாதிக்கப்பட்டு இருந்தார் என்பது குறிப்பிடத்தக்கது.