பூமாராங்கான 'அன்புமணி சுவரொட்டி'... அதிமுகவின் 'கவுண்ட்டர்' போஸ்டர்

By Mathi

Updated: Monday, April 13, 2020, 12:00 [IST]

Subscribe to Oneindia Tamil

சென்னை: அன்புமணி ஒரு போஸ்டர் அடித்து விளம்பரம் செய்தாலும் செய்தார்... அதைப் பற்றிய கிண்டல்கள் இன்னமும் ஓய்ந்துவிடவில்லை...இதோ அதிமுகவினர் அன்புமணி பாணியிலேயே போஸ்டர் அடித்து கலக்கியுள்ளனர்.

கோவையில் அண்மையில் நடைபெற்ற பாமக மாநாட்டையொட்டி, "மாற்றம் முன்னேற்றம் அன்புமணி" என்று தமிழகம் முழுவதும் போஸ்டர் ஒட்ட பரபரப்பு ஏற்பட்டது.

பாட்டாளி மக்கள் கட்சியின் இந்த போஸ்டருக்கு பதிலடி கொடுக்கும் வகையில், திமுகவினரும், "மாற்றம் முன்னேற்றம் மு.க.ஸ்டாலின்" என்று போஸ்டர் ஒட்டினர்.

ஃபேஸ்புக்கிலும் 'அன்புமணி சுவரொட்டி' படாதபாடு பட்டது; இந்நிலையில், பாமகவினருக்கும், திமுகவினருக்கும் பதிலடி கொடுக்கும் வகையில் கன்னியாகுமரி மாவட்ட செயலாளர் தளவாய்சுந்தரம் மற்றும் மாவட்ட அம்மா பேரவை இணைச் செயலாளர் எஸ்.ஏ.மகேஷ் ஆகியோர் சென்னையில் அதிரடி போஸ்டர்களை ஒட்டியுள்ளனர்.

"மாற்றம் முன்னேற்றம் அம்மா" என்று ஒட்டப்பட்டுள்ள போஸ்டரில் 'தீயசக்திகள் கையில் ஆட்சி மாற்றம்', 'வளர்ச்சி பாதையில் தமிழகம் முன்னேற்றம்', 'மக்கள் பணியில் அம்மா' என்று வாசகங்கள் இடம் பெற்றுள்ளன.

பா.ம.க.வை பின்பற்றி அதிமுகவினரால் ஒட்டப்பட்டுள்ள போஸ்டர் பரபரப்பை ஏற்படுத்தியுள்ளது.