ரத்த தானம் செய்வதுபோல நடித்த அதிமுக மா.செ! வீடியோ வைரலான நிலையில் ஜெயசுதா கொடுத்த விளக்கத்தை பாருங்க

Updated: Monday, May 12, 2025, 12:02 [IST]

Subscribe to Oneindia Tamil

திருவண்ணாமலை: அதிமுக பொதுச் செயலாளர் எடப்பாடி பழனிசாமியின் பிறந்தநாளை முன்னிட்டு நடைபெற்ற ரத்த தான முகாமில், ரத்த தானம் கொடுப்பது போல் நடித்து போட்டோவுக்கு போஸ் கொடுத்துள்ளார் அதிமுக திருவண்ணாமலை மத்திய மாவட்ட செயலாளர் ஜெயசுதா. இதுதொடர்பான வீடியோ வைரலாக பரவிய நிலையில் அவர் விளக்கம் கொடுத்துள்ளார்.

தமிழ்நாட்டின் முன்னாள் முதலமைச்சரும், அதிமுக பொதுச் செயலாளரும், தமிழ்நாடு சட்டமன்ற எதிர்க்கட்சி தலைவருமான எடப்பாடி பழனிசாமி இன்று தனது பிறந்த நாளை கொண்டாடுகிறார். இதனையொட்டி எடப்பாடி பழனிசாமிக்கு தலைவர்கள் பலரும் தங்களது வாழ்த்துக்களை தெரிவித்து வருகின்றனர்.

AIADMK Functionary Faces Backlash Over Fake Blood Donation

எடப்பாடி பழனிசாமியின் 71 வது பிறந்தநாளை அதிமுகவினர் தமிழ்நாடு முழுவதும் உற்சாகமாக கொண்டாடி வருகின்றனர். பல்வேறு நலத் திட்ட உதவிகள் வழங்கியும், ரத்த தானம் செய்தும், பொதுமக்களுக்கு உதவிகள் செய்தும் கொண்டாடி வருகின்றனர்.

அந்தவகையில், எடப்பாடி பழனிசாமி பிறந்தநாளையொட்டி அதிமுக சார்பில் திருவண்ணாமலையில் ரத்த தானம் வழங்கும் நிகழ்ச்சி நடைபெற்றது. இந்த நிகழ்ச்சியில் திருவண்ணாமலை மத்திய மாவட்ட அ.தி.மு.க. செயலாளர் ஜெயசுதா ரத்த தானம் செய்வது போல் கையை மட்டும் காண்பித்தபடி இருந்த வீடியோ வெளியானது.

அதிமுக மாவட்ட செயலாளர் ஜெயசுதா, ரத்த தானம் செய்து ரத்த தான முகாமை தொடங்கி வைப்பார் என கூறப்பட்ட நிலையில், அவர் வீடியோவுக்காக மட்டும் போஸ் கொடுத்த வீடியோ வெளியாகி பரபரப்பை ஏற்படுத்தியது.

ஊசி குத்துவது போல போஸ் மட்டும் கொடுத்த நிலையில், ரத்த தானம் செய்வது போன்ற வீடியோ வெளியான நிலையில் இது சமூக வலைதளங்களில் கடும் கேலிக்கு உள்ளானது. இந்நிலையில் இதுதொடர்பாக அ.தி.மு.க மாவட்ட செயலாளர் ஜெயசுதா விளக்கம் அளித்துள்ளார்.

அதிமுக திருவண்ணாமலை மத்திய மாவட்ட செயலாளர் ஜெயசுதா கூறுகையில், "ரத்த தானம் செய்வதற்காக தயார் செய்தார்கள். எனக்கு சர்க்கரை நோய் உள்ளது. சர்க்கரை அளவு எவ்வளவு என்று கேட்டார்கள். 210 என்று சொன்னதும் ரத்தம் கொடுக்கக்கூடாது என்று சொல்லி விட்டார்கள். இதில் ஒன்றும் இல்லை. நான் ரத்த தானம் கொடுத்ததாக பேட்டி கொடுத்தேனா?" எனக் கேள்வி எழுப்பி உள்ளார்.