அம்மா உணவகம், உப்பு பாக்கெட் பழசு.. அம்மா எக்ஸ்பிரஸ் ரயில் புதுசு!
சென்னை: அம்மா உணவகம், அம்மா சிமெண்ட், மெடிக்கல், உப்பு, மினரல் வாட்டர் வரிசையில், ஒருபடி அதிகமாகவே உணர்ச்சிவசப்பட்ட நிலையில், அம்மா பெயரில் ரயில்விட வேண்டும் என்று ரயில்வே கமிட்டி கூட்டத்தில், கோரிக்கைவிடுத்துள்ளார் அதிமுக கட்சியின் பொள்ளாச்சி தொகுதி எம்.பி. சி.மகேந்திரன்.
சென்னையில் சமீபத்தில் மண்டல ரயில்வே கலந்தாய்வு கமிட்டி கூட்டம் நடைபெற்றது. இதில் மகேந்திரன் பங்கேற்கவில்லை என்றபோதிலும், தனது சார்பில் வழங்கிய புத்தக குறிப்பில், பொள்ளாச்சி முதல் சென்னைக்கு, அம்மா எக்ஸ்பிரஸ் ரயில் என்ற பெயரில் புதிய ரயில் இயக்கப்பட வேண்டும் என்ற கோரிக்கையை முன்வைத்துள்ளார்.
இதை மண்டல ரயில்வே அதிகாரிகளும் உறுதி செய்துள்ளனர். இருப்பினும், புதிய ரயில் மற்றும் பெயர் சூட்டல் விவகாரங்களை ரயில்வே வாரியம்தான் கையாளுவதாக அவர்கள் தெரிவிக்கிறார்கள்.
இந்த நடவடிக்கையை கேள்விப்பட்டு, "வரவர, இவர்கள் பாசத்திற்கு ஒரு அளவே இல்லாமல் போய்க்கொண்டுள்ளது" என்று நமட்டு சிரிப்பு சிரிக்கிறார்கள் எதிர்க்கட்சியினர்.