தவெக எம்எல்ஏ - கலெக்டர் சர்ச்சையை முடிவுக்குக் கொண்டு வர முயற்சி? பேச்சுவார்த்தை நடத்தும் வன்னியரசு!
கள்ளக்குறிச்சி: கள்ளக்குறிச்சி மாவட்ட பெண் ஆட்சியர் ஜெ.இ. பத்மஜாவுக்கு, அந்தத் தொகுதியின் தமிழக வெற்றிக் கழக எம்.எல்.ஏ சி. அருள் விக்னேஷ் ஆபாசமான வாட்ஸ்அப் மெசேஜ்களை அனுப்பியதாக எழுந்துள்ள சர்ச்சை தமிழக அரசியலில் பெரும் புயலைக் கிளப்பியுள்ளது. ஆட்சி அமைத்து ஆறு மாதங்களே நிறைவடையும் நிலையில், ஆளுங்கட்சிக்கு ஏற்பட்டுள்ள இந்தப் பெரும் நெருக்கடியைச் சமாளிக்கவும், இந்த விவகாரம் மேலும் பெரிதாகாமல் தடுக்கவும் திரைமறைவில் தீவிர சமரச முயற்சிகள் நடைபெற்று வருவதாக அரசியல் வட்டாரங்களில் தகவல்கள் வெளியாகியுள்ளன.
களத்தில் இறங்கிய விசிக அமைச்சர் வன்னியரசு?
அரசியல் வட்டாரங்களில் வெளியாகியுள்ள தகவல்களின்படி, ஆளுங்கட்சிக் கூட்டணியில் அங்கம் வகிக்கும் விடுதலைச் சிறுத்தைகள் கட்சியைச் சேர்ந்த அமைச்சர் வன்னியரசு, இந்த விவகாரத்தைச் சுமுகமாக முடித்து வைக்கத் தீவிரமாகப் பணியாற்றி வருவதாகக் கூறப்படுகிறது. குறிப்பாக, இந்தப் பிரச்சனை சட்டரீதியாகவோ அல்லது அரசியல் ரீதியாகவோ இன்னும் விஸ்வரூபம் எடுப்பதற்கு முன்பாக, இதனை அப்படியே அமுக்கிவிட வேண்டும் என்ற நோக்கில் அவர் இருதரப்பிடமும் பேச்சுவார்த்தை நடத்தி வருவதாகத் தகவல்கள் கசிந்துள்ளன.
மாவட்ட நிர்வாகத்திற்கும் மக்கள் பிரதிநிதிக்கும் இடையே ஏற்பட்டுள்ள இந்த மோதல் போக்கு, ஆளுங்கட்சி கூட்டணியின் நற்பெயருக்குப் பெரிய அளவில் களங்கத்தை ஏற்படுத்தி விடும் எனக் கருதப்படுகிறது. எனவே, சம்பந்தப்பட்ட மாவட்ட ஆட்சியர் தரப்பிடமும், எம்.எல்.ஏ அருள் விக்னேஷ் தரப்பிடமும் தனித்தனியாகப் பேசி, இந்த விவகாரத்தை இத்துடன் முடிவுக்குக் கொண்டு வர அமைச்சர் வன்னியரசு தீவிர முயற்சி மேற்கொண்டு வருவதாகக் கூறப்படுகிறது.
எதிர்க்கட்சிகளின் கடும் அழுத்தமும், கூட்டணிக்குள் சலசலப்பும்
ஒருபுறம் சமரச முயற்சிகள் நடப்பதாகக் கூறப்பட்டாலும், மறுபுறம் எதிர்க்கட்சிகள் இந்த விவகாரத்தை விடுவதாக இல்லை. திமுக எம்.பி கனிமொழி கருணாநிதி உள்ளிட்ட தலைவர்கள், "மாவட்ட கலெக்டருக்கே பாதுகாப்பு இல்லாத சூழல் நிலவுகிறது" எனக் கடுமையாக விமர்சித்து வருகின்றனர். மேலும், கள்ளக்குறிச்சி எஸ்.பி-யிடம் புகார் அளித்துள்ள திமுக எம்.எல்.ஏ வசந்தம் கார்த்திகேயன், எம்.எல்.ஏ-வின் செல்போனைப் பறிமுதல் செய்து சிபிஐ அல்லது சிபிசிஐடி விசாரணை நடத்த வேண்டும் எனக் கோரிக்கை விடுத்துள்ளார்.
இதற்கிடையில், ஆளுங்கட்சிக் கூட்டணியில் உள்ள காங்கிரஸ் கட்சியின் தலைவர்களிடையேயும் இது குறித்து இருவேறு கருத்துகள் நிலவுகின்றன. காங்கிரஸ் எம்.பி ஜோதிமணி, "குற்றச்சாட்டு உண்மையாக இருந்தால் கடுமையான நடவடிக்கை எடுக்க வேண்டும்" என வலியுறுத்தியுள்ள நிலையில், தமிழ்நாடு காங்கிரஸ் கமிட்டித் தலைவர் மாணிக்கம் தாகூர், "எந்த ஆதாரமும் இல்லாமல் வாட்ஸ்அப் வதந்திகளை வைத்து எம்.எல்.ஏ அருள் விக்னேஷை குறிவைப்பது தவறு.. அவர் பாவம்" என அவருக்கு ஆதரவாகக் கருத்து தெரிவித்துள்ளார்.
தொடர் மறுப்பில் எம்.எல்.ஏ
தனக்கு எதிரான அனைத்துக் குற்றச்சாட்டுகளையும் எம்.எல்.ஏ அருள் விக்னேஷ் தொடர்ந்து மறுத்து வருகிறார். "கள்ளக்குறிச்சி பேருந்து நிலையம் கட்டுவதில் உள்ள ரியல் எஸ்டேட் முறைகேடுகளைத் நான் அம்பலப்படுத்தியதாலேயே, எதிர்க்கட்சிகள் என் மீது மலிவான அரசியல் செய்கின்றன. கலெக்டர் பங்களாவில் 24 மணி நேரமும் துப்பாக்கி ஏந்திய போலீஸ் பாதுகாப்பும் சிசிடிவி கேமராக்களும் உள்ள நிலையில், அங்கு அத்துமீறி நுழைவது சாத்தியமில்லை" என்று அவர் விளக்கமளித்துள்ளார்.
ஆனால், இரண்டு மாதங்களுக்கு முன்பே கலெக்டரிடம் எம்.எல்.ஏ தவறாக நடந்து கொண்டதாகக் கூறப்படும் விவகாரம் குறித்து முதலமைச்சர் அலுவலகம் தரப்பில் அவருக்கு ஏற்கனவே எச்சரிக்கை விடுக்கப்பட்டதாக விழுப்புரம் சரக டிஐஜி அருளரசு தெரிவித்துள்ளார். ஆட்சி அமைத்து ஆறு மாதங்கள் நிறைவடைந்துள்ள நிலையில், அடுத்தடுத்து எழும் இத்தகைய சர்ச்சைகளால் அதிருப்தி அடைந்துள்ள முதல்வர் விஜய், அனைத்து எம்.எல்.ஏ-க்களையும் அழைத்துப் பொதுவெளியிலும் அரசு அதிகாரிகளிடமும் கண்ணியத்துடன் நடந்து கொள்ள வேண்டும் எனக் கடுமையான அறிவுறுத்தல்களை வழங்கியுள்ளார். திரைமறைவில் நடப்பதாகக் கூறப்படும் இந்தச் சமரச முயற்சிகள் பலனளிக்குமா அல்லது இந்த விவகாரம் அடுத்தகட்ட விசாரணைக்குச் செல்லுமா என்பதைப் பொறுத்திருந்தே பார்க்க வேண்டும்.
Click it and Unblock the Notifications
Sign in with Google
