தமிழக பாஜக வேட்பாளர்கள் இவர்கள்தான்?
சென்னை: தமிழகத்தில் பாஜக கூட்டணியில் தொகுதி எண்ணிக்கை பங்கீடு சுமூகமாக முடிந்துள்ளது. தலைவர் ராஜ்நாத்சிங், யாருக்கு எத்தனை தொகுதிகள், எந்தெந்த தொகுதிகள் என அறிவித்துள்ளார்.
பாஜக கூட்டணியில் தே.மு.தி.க.-14, பா.ஜ.க.-8, பா.ம.க.-8, ம.தி.மு.க-7, கொங்கு நாடு கட்சி-1, இந்திய ஜனநாயக கட்சி-1 என்ற ரீதியில் 39 தொகுதிகளிலும் பங்கீடு செய்யப்பட்டுள்ளது.
பாஜக போட்டியிடும் 8 தொகுதிகளில் போட்டியிடும் வேட்பாளர்களை பா.ஜ.க.வில் ஏற்கனவே தேர்வு செய்து விட்டனர். அந்த வேட்பாளர்கள் விவரம்:
யாருக்கு எந்த தொகுதி
தென்சென்னை- இல.கணேசன், கன்னியாகுமரி- பொன்.ராதாகிருஷ்ணன், கோவை- வானதி சீனிவாசன், ராமநாதபுரம்- கருப்பு முருகானந்தம், சிவகங்கை- எச். ராஜா வேலூர்- தமிழிசை சவுந்திரராஜன், நீலகிரி- ஜி.கே.செல்வக்குமார், தஞ்சாவூர்- பி.சி ராதாகிருஷ்ணன்
கைமாறிய தொகுதிகள்
இதில் ஸ்ரீபெரும்புதூர், திருப்பூர், தென்காசி தொகுதிகளை பாஜக குறிவைத்திருந்தது. ஆனால் இரண்டு தொகுதி மதிமுகவிற்கும், ஒரு தொகுதி தேமுதிகவிற்கும் ஒதுக்கப்பட்டுவிட்டது. இதனால் தமிழிசை சவுந்திரராஜன் வேலூர் தொகுதிக்கு இடம்மாறும் நிலை ஏற்பட்டுள்ளது.
பி.சி.ராதாகிருஷ்ணன்
கோவையில் போட்டியிட முன்னாள் மாநில தலைவர் சி.பி.ராதாகிருஷ்ணன் விருப்பம் தெரிவித்திருந்தார். ஆனால் சொந்த ஊர் என்பதால் கோவையில் போட்டியிட வானதி சீனிவாசன் தீவிரமாக உள்ளார் என்றும் தகவல்கள் தெரிவிக்கின்றன. எனவே தஞ்சாவூர் தொகுதியில் பி.சி.ராதாகிருஷ்ணனுக்கு வாய்ப்பு வழங்கப்படலாம் என கூறப்படுகிறது.