காமன்வெல்த் விவகாரத்தில் அரசியல் செய்கிறது பாஜக- திருமா புகார்
சென்னை: காமன்வெல்த் மாநாட்டு விவகாரத்தில் அரசியல் செய்கிறது பாஜக என்று விடுதலைச் சிறுத்தைகள் தலைவர் திருமாவளவன் குற்றம் சாட்டியுள்ளார்.
சென்னை வள்ளுவர் கோட்டம் அருகே, இலங்கையில் நடைபெறும் காமன்வெல்த் மாநாட்டை இந்தியா புறக்கணிக்க வேண்டும் என்று வலியுறுத்தி விடுதலை சிறுத்தைகள் கட்சி சார்பில் கண்டன ஆர்ப்பாட்டம் நடந்தது.
இதில் கலந்து கொண்டு திருமாவளவன் பேசுகையில்,
இலங்கையில் நடைபெறும் காமன்வெல்த் மாநாட்டில் பிரதமர் மன்மோகன் சிங் கலந்து கொள்ள கூடாது. இந்தியா சார்பில் பிரதிநிதிகள் யாரும் பங்கேற்க கூடாது என்று மத்திய அரசுக்கு விடுதலை சிறுத்தைகள் கட்சி சார்பில் வேண்டுகோள் விடுக்கிறோம்.
இந்த பிரச்சனையில் தமிழக காங்கிரஸ் தலைவர்கள் ஒருமித்த கருத்துகளை தெரிவித்து வருகிறார்கள். மத்திய அமைச்சர்கள் ஜி.கே.வாசன், ஜெயந்தி நடராஜன் ஆகியோர் தமிழக மக்களின் உணர்வுகளை மத்திய அரசுக்கு எடுத்து கூறி தங்கள் ஆதரவை தெரிவித்து உள்ளனர்.
மத்திய அமைச்சர் ப.சிதம்பரம், பிரதமர் நல்ல முடிவு எடுப்பார் என்று கூறி உள்ளார். தமிழக கங்கிரஸ் தலைவர் ஞானதேசிகனும் தனது உணர்வை வெளிப்படுத்தி உள்ளார்.
இந்த மாநாட்டில் இந்தியா பங்கேற்றால் ராஜபக்சே செய்த இனப்படுகொலைக்கு ஆதரவு தெரிவித்தது ஆகி விடும். சர்வதேச மன்றத்தில் அங்கீகாரம் கிடைத்து விடும். தமிழக காங்கிரசில் ஏற்பட்டு உள்ள மாற்றத்தால் இந்த மாநாட்டில் பிரதமர் நிச்சயமாக கலந்து கொள்ள மாட்டார் என நான் நம்புகிறேன்.
இந்த பிரச்சினையில் பாரதீய ஜனதா கட்சி அரசியல் நடத்துகிறது. காமன்வெல்த் மாநாட்டில் இந்தியா கலந்து கொள்ள வேண்டும் என காங்கிரஸ் கட்சிக்கு நெருக்கடி கொடுக்கிறது.
ஆட்சியில் இருந்த போது பாரதீய ஜனதா ஈழத்தமிழர்களுக்காக எதையும் செய்யவில்லை. இந்த மாநாட்டிலும் இந்தியா கலந்து கொள்ளவில்லை என்றால் இருநாடுகளுக்கிடையே உறவில் எந்த பாதிப்பும் ஏற்படாது.
மாநாட்டில் இந்தியா கலந்து கொண்டுதான் ஈழத் தமிழர்களுக்கு நல்லது செய்ய வேண்டும் என்று இல்லை. இதில் பங்கேற்காமலேயே நன்மை செய்யலாம்.
இசைப்பிரியா உயிரோடு பிடிக்கப்பட்டு படுகொலை செய்யப்பட்டு உள்ளார். இதற்கான ஆதார வீடியோ பதிவு உள்ளது. மார்ச் மாதம் ஜெனீவாவில் நடைபெறும் மனித உரிமை ஆணைய கூட்டத்தில் இசைப்பிரியா கொலை செய்யப்பட்டதற்கான ஆதாரத்தை வெளியிடுவதன் மூலம் ராஜபக்சேவுக்கு மேலும் நெருக்கடி ஏற்படும் என்றார் அவர்.
Click it and Unblock the Notifications
Sign in with Google