"கண்ணம்மா" போஸ் வெங்கட்டுக்கு சீட் தருவாரா கருணாநிதி?

Updated: Wednesday, March 2, 2016, 12:54 [IST]

Subscribe to Oneindia Tamil

புதுக்கோட்டை: சீரியல் நடிகராக அறிமுகமாகி தற்போது, சினிமா நடிகராக வலம் வருகின்ற நடிகர் "போஸ்" வெங்கட் அறந்தாங்கி தொகுதியில் சீட் கேட்டு திமுகவில் விருப்ப மனு கொடுத்துள்ளாராம்.

தமிழில் முதன்முதலாக மெட்டி ஒலி சீரியல் மூலமாக அறிமுகமான போஸ் வெங்கட், அந்த நாடகத்தில் அவரது கதாப்பாத்திரமான போஸ் என்ற அடைமொழியுடனேயே அழைக்கப்பட்டு வருகின்றார்.

அதன்பின்பு பாரதிராஜவின் ஈரநிலம் படத்தில் வில்லனாக அறிமுகமாகி சினிமாவிற்குள்ளும் காலடி எடுத்து வைத்தார்.

கண்ணம்மா கண்ணம்மா:

தன்னுடன் நடித்த சக நடிகையான சோனியாவை திருமணம் முடித்துள்ள வெங்கட்டுக்கு இரண்டு குழந்தைகள் உள்ளனர். தீவிர திமுக குடும்பத்தில் இருந்து வந்துள்ள வெங்கட் திமுக தலைவர் கருணாநிதியின் கதை, வசனத்தில் வெளிவந்த "கண்ணம்மா" என்ற திரைப்படத்தில் நடித்துள்ளார். மேலும், அவருடைய கதை, வசனத்தில் டிவி சீரியல்களிலும் நடித்துள்ளார்.

திமுகவில் விருப்பமனு:

இந்நிலையில் வருகின்ற சட்டமன்றத் தேர்தலில் அறந்தாங்கி தொகுதியில் போட்டியிட திமுகவில் விருப்ப மனு விண்ணப்பித்துள்ளார். திமுகவிற்காகவே அர்ப்பணிப்பான தன்னுடைய குடும்பத்தின் சார்பில் போட்டியிட சீட் கேட்டுள்ளதாகவும், கட்சிக்காக பாடுபடுவதே தன்னுடைய முதல் கொள்கை என்றும் அவர் பேட்டி ஒன்றில் தெரிவித்துள்ளார்.

ரத்தத்தில் கலந்த கட்சி:

2011ல் காஞ்சி, உத்திரமேரூரில் 30 நாள் கடும் பிரச்சாரம் செய்துள்ளதாகவும், அறந்தாங்கி நகராட்சியை தி.மு.க கைப்பற்ற தீவிர பிரச்சாரம் செய்துள்ளதாகவும், திமுக கட்சியும், கருணாநிதியும் தன்னுடைய ரத்தத்தில் கலந்துள்ளதாகவும் தெரிவித்துள்ளார். மேலும், சிறுவயதிலேயே திமுகவிற்காக அருவாள் எடுத்தவன் நான் என்றும் தெரிவித்துள்ளார்.

அடுத்த டார்கெட்:

ஏற்கனவே சின்னத்திரை சங்க தேர்தல்களில் போட்டியிட்டு செயலாளராக பதவி வகித்த போஸ் வெங்கட், தற்போது சட்டமன்றத் தேர்தலிலும் போட்டியிடக் களத்தில் குதித்திருப்பது குறிப்பிடத்தக்கது.