கிடுகிடு உயர்வு.. இன்று முதல் சினிமா டிக்கெட் விலையுடன் 28 % ஜிஎஸ்டி.. அபிராமி ராமநாதன் தகவல்

இன்று முதல் சினிமா டிக்கெட் விலையுடன் 28 சதவீத ஜிஎஸ்டி சேர்த்து வசூலிக்கப்படும் என்று தமிழ்த் திரைப்பட உரிமையாளர்கள் சங்கத் தலைவர் அபிராமி ராமநாதன் தெரிவித்துள்ளார்.

சென்னை: ஜிஎஸ்டி மற்றும் கேளிக்கை வரி என இரட்டை வரி முறையை எதிர்த்து திரையரங்க உரிமையாளர்கள் திரையரங்குகளை மூடி போராட்டத்தில் ஈடுபட்டனர்.

இந்நிலையில், நேற்று தலைமைச் செயலகத்தில் அமைச்சர்களுடன் திரையரங்க உரிமையாளர்கள் மற்றும் திரைத்துறையினருடன் பேச்சுவார்த்தை நடைபெற்றது.

அமைச்சர்களுடன் பேச்சுவார்த்தைக்கு பின்னர் அபிராமி ராமநாதன் செய்தியாளர்களிடம் பேசியதாவது:

4 நாட்களாக 1000 திரையரங்குகள் மூடப்பட்டிருந்தன. இதனால் நாள் ஒன்றுக்கு சுமார் 20 கோடி ரூபாய் நஷ்டம் ஏற்பட்டது. எங்கள் இயலாமையினால்தான் நாங்கள் திரையரங்குகளை மூடினோம்.

அமைச்சர்கள் ஜெயக்குமார், வேலுமணி, கடம்பூர் ராஜு ஆகியோரிடம் பேசினோம். அமைச்சர்கள் எங்கள் சிரமங்களை புரிந்து கொண்டார்கள். அதன் அடிப்படையில் இந்தப் பிரச்சனை இன்று ஒரு முடிவிற்கு வந்துள்ளது.

கேளிக்கை வரி போட வேண்டுமா வேண்டாமா என்பதை முடிவு செய்ய குழு ஒன்று அமைக்கப்பட்டுள்ளது. இந்தக் குழுவில் சினிமா துறை சார்பில் 8 பேர் இருக்கிறோம். அது தவிர அரசு சார்பில் 6 பேரும் குழுவில் இடம் பெற்றுள்ளனர்.

இந்தக் கமிட்டியின் முடிவு கண்டிப்பாக எங்களுக்கு சாதகமாக இருக்கும். இதனையடுத்து திரையரங்குகள் நாளை வழக்கம் போல் செயல்படும். இன்று முதல் திரையரங்குகளில் டிக்கெட் விலை 120 ரூபாயுடன் ஜிஎஸ்டி வரி 28 சதவீதம் சேர்த்து ரூ.153.60 காசாக இருக்கும் என்று அபிராமி ராமநாதன் தெரிவித்தார்.

English summary

Cinema ticket price will be hike from tomorrow, says Abirami Ramanathan.