மோடி பதவியேற்பு விழா: விஜய்காந்த் வந்தால் ஜெயலலிதா போவாரா?
சென்னை: நரேந்திர மோடியின் பதவியேற்பு விழாவில் தமிழக முதல்வர் ஜெயலலிதா கலந்து கொள்வார் என்று அதிமுக கட்சி வட்டாரங்கள் தெரிவிக்கின்றன.
நாடாளுமன்ற தேர்தலில் பாஜக பெற்றி வெற்றிக்கு வாழ்த்து தெரிவித்து நரேந்திர மோடிக்கு, ஜெயலலிதா கடிதம் எழுதியிருந்தார். இதையடுத்து ஜெயலலிதாவை போனில் தொடர்பு கொண்டு பேசிய மோடி, மத்திய அரசிடமிருந்து தமிழகத்துக்கு தேவையான அனைத்து ஒத்துழைப்பும் அளிக்கப்படும் என்று உறுதியளித்தார்.
இந்த நட்பை பலப்படுத்திக் கொள்ளும் வகையில் நரேந்திர மோடி பிரதமராக பங்கேற்கும் விழாவுக்கு முதல்வர் ஜெயலலிதா செல்லக்கூடும் என்று அதிமுக வட்டாரங்கள் தெரிவிக்கின்றன.
அனைத்து மாநில முதல்வர்களுக்கும் மோடி சார்பில் பதவியேற்பு விழாவில் பங்கேற்க அழைப்புவிடுக்க ஆயத்தப் பணிகள் நடந்து வருவதாகவும் கூறப்படுகிறது. பிரதமராக மோடி பதவியேற்க உள்ள நாள் உறுதி செய்யப்பட்ட உடன், அழைப்பிதழ்கள் விடுக்கப்படுமாம்.
2011ம் ஆண்டு ஜெயலலிதா பதவியேற்பு விழாவில் மோடி கலந்து கொண்டார்.
அதே போல 2012ம் ஆண்டு மோடி குஜராத்தில் நான்காவது முறையாக முதல்வராக பதவியேற்ற விழாவில், தமிழக முதல்வர் ஜெயலலிதா பங்கேற்று அவருக்கு பூங்கொத்து கொடுத்து வாழ்த்து தெரிவித்தது நினைவு கூறத்தக்கது.
இதன் பின்னர் ஜெயலலிதா வீட்டில் மோடிக்கு விருந்தும் அளிக்கப்பட்டதும் குறிப்பிடத்தக்கது.
ஆனால், பதவியேற்பு விழாவுக்கு விஜய்காந்தையும் அழைத்துள்ளது பாஜக. அவர் வந்தால் ஜெயலலிதா வருவாரா?