கொடைக்கானல் ஓய்வு முடிந்தது.. ஸ்டாலின் மேஜையில் உளவுத்துறை ரிப்போர்ட்! ரெடியான புது அமைச்சரவை லிஸ்ட்

Updated: Wednesday, April 29, 2026, 13:42 [IST]

Subscribe to Oneindia Tamil

கொடைக்கானல்: தமிழக முதல்வர் மு.க. ஸ்டாலின் அவர்கள் தனது நான்கு நாள் கொடைக்கானல் சுற்றுப்பயணத்தை முடித்துக்கொண்டு இன்று சென்னை திரும்புகிறார். தேர்தல் பரபரப்புகளுக்கு மத்தியில் மேற்கொள்ளப்பட்ட இந்த சிறு ஓய்வு, முதல்வருக்கு பெரும் புத்துணர்ச்சியை அளித்துள்ளதாக அறிவாலய வட்டாரங்கள் தெரிவிக்கின்றன.

ரிலாக்ஸ் மோடில் முதல்வர்

கடந்த நான்கு நாட்களாக கொடைக்கானலில் தங்கியிருந்த முதல்வர் ஸ்டாலின், அங்குள்ள இதமான காலநிலையை ரசித்ததுடன், மிகவும் உற்சாகமாகவும் மகிழ்ச்சியுடனும் காணப்பட்டார். வழக்கமான அரசியல் நெருக்கடிகள் மற்றும் கோப்பு ஆய்வுகளில் இருந்து விலகி, இந்த நான்கு நாட்களையும் அவர் முழுமையாக "ரிலாக்ஸ்" செய்வதற்குப் பயன்படுத்தியுள்ளார். தன்னை சந்தித்த அமைச்சர்களிடம் பேசுகையில், இந்த விடுமுறை தனக்கு மிகுந்த மனநிறைவைத் தந்துள்ளதாகவும், உடல்ரீதியாகவும் மனரீதியாகவும் தன்னை புதுப்பித்துக் கொண்டதாகவும் அவர் நெகிழ்ச்சியுடன் பகிர்ந்து கொண்டுள்ளார்.

டெல்லி சோர்ஸ்கள் தந்த நற்செய்தி

முதல்வர் கொடைக்கானலில் ஓய்வில் இருந்தாலும், அவரது கவனம் தமிழக தேர்தல் முடிவுகள் மற்றும் அது குறித்த தேசிய அளவிலான பார்வையின் மீதே இருந்தது. குறிப்பாக, தமிழக தேர்தல் முடிவுகள் எப்படி இருக்கும் என்பது குறித்து மத்திய அரசு மற்றும் டெல்லி வட்டாரங்கள் என்ன கணக்கு போடுகின்றன என்பதைத் தனது பிரத்யேக "சோர்ஸ்கள்" மூலம் அவர் கேட்டறிந்துள்ளார்.

அப்போது அவருக்குக் கிடைத்த தகவல்கள் மிகுந்த நம்பிக்கையை அளிப்பதாக உள்ளன. தமிழகத்தில் மீண்டும் திமுக ஆட்சியே அமையும் என்றும், ஆட்சியமைப்பதற்குத் தேவையான பெரும்பான்மையான இடங்களை திமுக கூட்டணி தாராளமாகப் பெறும் என்றும் டெல்லி வட்டாரங்கள் கணித்துள்ளன. இன்னும் ஒரு படி மேலே போய், கூட்டணி கட்சிகளின் தயவின்றி திமுக தனித்தே ஆட்சியமைக்கக் கூடிய அளவுக்குப் பெரும்பான்மை இடங்களை (Magic Number) அறுவடை செய்யும் என்று மத்திய உள்துறை அமைச்சகம் கருதுவதாக அந்த சோர்ஸ்கள் முதல்வரிடம் ரகசியமாகத் தெரிவித்துள்ளன.

இணக்கமான உறவுக்குத் திட்டம்

மீண்டும் திமுக ஆட்சியே அமையும் பட்சத்தில், தமிழக அரசுடன் மத்திய அரசு எந்த மாதிரியான உறவைக் கையாள வேண்டும் என்பது குறித்தும், எந்தளவுக்கு இணக்கமாகப் போக வேண்டும் என்பது பற்றியும் மத்திய உள்துறை அமைச்சகத்தில் ஆலோசனைகள் நடத்தப்பட்டதாகக் கூறப்படுகிறது. இந்தத் தகவல் முதல்வருக்குப் பெரும் அரசியல் பலத்தையும், உற்சாகத்தையும் கொடுத்துள்ளது. டெல்லியின் இந்த மனமாற்றம் மற்றும் சாதகமான தேர்தல் கணிப்புகள் முதல்வரின் ஓய்வு நாட்களை மேலும் இனிமையாக்கியுள்ளன.

புதிய அமைச்சரவை பட்டியல் தயார்?

இந்த அதீத உற்சாகமான மனநிலையிலேயே முதல்வர் ஸ்டாலின் இன்று சென்னை திரும்புகிறார். இந்த நான்கு நாள் ஓய்வின் போது, அடுத்த முறை அமையும் ஆட்சியில் தனது அமைச்சரவை சகாக்கள் யார் யார் இருக்க வேண்டும் என்பது குறித்தும், எந்தெந்த துறைகளில் மாற்றங்கள் செய்ய வேண்டும் என்பது குறித்தும் அவர் ஒரு தீர்க்கமான முடிவுக்கு வந்துள்ளதாகத் தெரிகிறது.

திமுக மேலிட வட்டாரங்களில் கசிந்துள்ள தகவல்களின்படி, தனது புதிய கேபினெட் சகாக்களின் பட்டியலை முதல்வர் ஸ்டாலின் ஏற்கனவே இறுதி செய்து கையில் வைத்துள்ளார். உள்ளூர் நிலவரங்களை ஆய்வு செய்து, ஒரு வலுவான அமைச்சரவைப் பட்டியலுடன் அவர் சென்னை திரும்புவது திமுக நிர்வாகிகள் மத்தியில் பெரும் எதிர்பார்ப்பைக் கிளப்பியுள்ளது.

சென்னை திரும்பியதும் தேர்தல் வாக்கு எண்ணிக்கை மற்றும் அடுத்தகட்ட அரசியல் நடவடிக்கைகள் குறித்து மூத்த நிர்வாகிகளுடன் முதல்வர் ஆலோசனைகளைத் தொடங்குவார் என எதிர்பார்க்கப்படுகிறது. மொத்தத்தில், கொடைக்கானல் பயணம் முதல்வருக்கு வெறும் ஓய்வாக மட்டுமில்லாமல், அடுத்த ஐந்தாண்டு கால ஆட்சிக்கான ஒரு தெளிவான வரைபடத்தை உருவாக்கும் களமாகவும் அமைந்துள்ளது.

- சிறப்பு நிருபர் எழில்