அதிமுக கோவை மாவட்ட செயலர் செ.ம. வேலுசாமிக்கு 'கல்தா' - மேயர் பதவியும் பறிபோனது!!

கோவை: அதிமுகவின் கோவை மாவட்ட செயலர் பதவியில் இருந்து செ.ம. வேலுசாமியை அக்கட்சி பொதுச்செயலரும் தமிழக முதல்வருமான ஜெயலலிதா நேற்று இரவு நீக்கினார். இதைத் தொடர்ந்து மாநகராட்சி மேயர் பதவியை செ.ம.வேலுச்சாமி நேற்று இரவே ராஜினாமா செய்தார்.

கோவை மாநகராட்சி மேயராக இருப்பவர் அ.தி.மு.க.வை சேர்ந்த செ.ம.வேலுச்சாமி. இவர், கோவை மாநகர் மாவட்ட அ.தி.மு.க. செயலாளராகவும் உள்ளார்.

இந்நிலையில், கோவை மாநகர் மாவட்ட அ.தி.மு.க. செயலாளர் பொறுப்பில் இருந்து வேலுச்சாமியை அக்கட்சியின் பொதுச் செயலாளரும் தமிழக முதல்வருமான ஜெயலலிதா நேற்று நீக்கி உத்தரவிட்டார். மேலும் வேலுச்சாமி, அ.தி.மு.க.வில் வகித்து வந்த அனைத்து பொறுப்புக்களில் இருந்து விடுவிக்கப்படுவதாகவும் ஜெயலலிதா அறிவித்தார்.

இப்படி கோவை மாநகர் மாவட்ட செயலாளர் பதவி உட்பட அனைத்து கட்சி பொறுப்புக்களில் இருந்தும் தன்னை தலைமை விடுவித்ததை அடுத்து செ.ம.வேலுச்சாமி தனது கோவை மாநகர மேயர் பதவியை ராஜினாமா செய்துள்ளார்.

தனது மேயர் பதவி விலகல் கடிதத்தை கோவை மாநகராட்சி ஆணையரிடம் வேலுச்சாமி அளித்துள்ளார்.

English summary

Coimbatore city Corporation Mayor S.M.Velusamy resigned his post on Wednesday.