”ஓட்டுப் போட்டீங்களா?” அப்போ 'கொக்கரக்கோ' சிக்கன் கடையில ஒரு கிலோ கறிக்கு 20% தள்ளுபடி!
சென்னை: பொது தேர்தலில் மக்கள் அனைவரும் வாக்களிப்பதை ஊக்குவிக்க எப்போதும் இல்லாத அளவிற்கு இந்திய தேர்தல் ஆணையம் பல்வேறு நடவடிக்கைகளை எடுத்திருந்தது.
"ஓட்டு போடுவது ஒவ்வொருவரின் ஜனநாயக கடமை " என்பதை விளக்கும் விளம்பர தட்டிகள் , சுவரொட்டிகள், ஊடக விளம்பரங்கள், குறுந்தகடுகள் உள்ளிட்டவற்றை வெளியிட்டது.
இதேபோன்று, சமூக பொறுப்புணர்வுள்ள பல தனியார் நிறுவனங்களும் வாக்களிப்பின் முக்கியத்துவத்தை வலியுறுத்தி விழிப்புணர்வு விளம்பரங்களை வெளியிட்டன.
வியாபார உத்தியில் நிறுவனங்கள்:
அதே சமயம் சில நிறுவனங்கள் அவற்றின் வர்த்தகத்தை அதிகரித்துக் கொள்ள இந்த பிரசார உத்தியை பயன்படுத்திக் கொண்டுள்ளன.
“மை” இருந்தா தள்ளுபடி:
இந்நிறுவனங்கள் வாக்களித்ததற்கு சான்றாக கை விரலில் உள்ள அடையாள மையை காண்பிப்போருக்கு சலுகை விலையில் பல்வேறு பொருட்களை வழங்குவதாக அறிவித்துள்ளன.
லேக்மே சலூன்:
இந்த வகையில் சென்னையை சேர்ந்த சிகை அழகு நிறுவனமான "லேக்மே சலூன்" கை விரலில் அடையாள மையை காண்பிக்கும் வாடிக்கையாளர்களுக்கு 50 சதவீத சலுகை விலையில் சிகை அலங்காரம் செய்யப்படும் என்று அறிவித்துள்ளது. இச்சலுகை வரும் 30 ஆம் தேதி வரை கிடைக்கும் என இந்நிறுவனம் தெரிவித்து உள்ளது.
நேச்சுரல்ஸ்:
அது போன்று " நேச்சுரல்ஸ்" நிறுவனம் தேர்தல் நாளன்று அதன் அனைத்து விதமான அழகு பராமரிப்பு சேவைகளுக்கான கட்டணத்தில் 20 சதவீதம் தள்ளுபடி வழங்கியது.
எப்பீபீ நிறுவனம்:
எப்பீபீ விற்பனையகங்களில் தேர்தல் நாளை முன்னிட்டு நேற்று பெண்களுக்கான பிரத்யேக ஆடைகளின் விலையை 10 சதவீதம் குறைத்தது.
கேக் வேர்ல்டு:
"கேக் வேர்ல்டு" நிறுவனம் அதன் அனைத்து வகை கேக்குகளின் விலையில் 15 சதவீதம் தள்ளுபடி செய்துள்ளது.
ராஜா சிக்கன் கடை:
அயனாவரத்தில் உள்ள ராஜா சிக்கன் அண்டு மட்டன் சென்டர் ஒரு கிலோ கோழிக்கறி விலையில் 20 ரூபாய் தள்ளுபடி செய்துள்ளது.
பிராஸ் டேக்ஸ்:
ஆழ்வார்பேட்டையில் உள்ள பிராஸ் டேக்ஸ் நிறுவனம் பலதரப்பட்ட ஆடைகளின் விலையில் 10 சதவீதம் தள்ளுபடி சலுகையை அறிவித்துள்ளது.
ஆன்லைன் சலுகை:
இந்நிறுவனம் கை விரலில் அடையாள மை உள்ளதை படமெடுத்து அனுப்பும் "ஆன்லைன்" வாடிக்கையாளர்களுக்கு விற்பனை விலையில் 15 சதவீத தள்ளுபடி வழங்குகிறது. இச்சலுகை வரும் மே மாதம் 1 ஆம் தேதி வரை கிடைக்கும் என இந்நிறுவனம் தெரிவித்துள்ளது.
மெக்டொனால்ட்ஸ்:
மெக்டொனால்ட்ஸ் நிறுவனம் அதன் "ராயல் மீல்" பர்கர் வாங்குவோருக்கு வரும் 27 ஆம் தேதி வரை "மெக்ப்ளரி" ஐஸ்கிரீம் இலவசமாக வழங்கப்படும் என அறிவித்துள்ளது.
ராம்ராஜ் காட்டன்:
ராம்ராஜ் காட்டன் நிறுவனம் அடையாள மையை காண்பித்து 1000 ரூபாய் மதிப்புள்ள ஆடைகளை வாங்கும் வாடிக்கையாளருக்கு இலவசமாக துண்டை வழங்குகிறது. இச்சலுகை வரும் 30 ஆம் தேதி வரை அமலில் உள்ளதாக இந்நிறுவனம் தெரிவித்துள்ளது.
விழிப்புணர்வு + வியாபாரம்:
இது போன்று இந்தியா முழுவதும் பல நிறுவனங்கள் தேர்தல் விழிப்புணர்வு பிரசாரத்தில் அவற்றின் வர்த்தகத்தை அதிகரித்துக் கொள்ளும் நடவடிக்கையில் ஈடுபட்டுள்ளன.