தந்தி டிவியின் கருத்து கணிப்பை விட எக்ஸிட் போலில் எக்ஸ்ட்ரா தொகுதிகளை அள்ளிய திமுக

சென்னை: தந்தி டிவி நடத்திய கருத்து கணிப்பை ஒப்பிடுகையில் அதனுடைய எக்ஸிட் போலில் அதிமுகவை விட திமுக கூடுதல் தொகுதிகளில் முன்னேறுவதாக தெரிவிக்கப்பட்டுள்ளது.

தந்தி டிவி தேர்தலுக்கு முந்தைய கருத்து கணிப்பு ஒன்றை வெளியிட்டது. அதில் அதிமுக 102; திமுக 79; பாமக-1; இழுபறி- 52 தொகுதிகள் என நேற்று அறிவித்திருந்தது. இன்று தேர்தலுக்கு பிந்தைய கருத்து கணிப்பான எக்ஸிட் போலை தந்தி டிவி வெளியிட்டுள்ளது.

இதில் அதிமுக தேர்தலுக்கு முந்தைய கருத்து கணிப்பைவிட 9 தொகுதிகள் கூடுதலாக 111, திமுக 20 தொகுதிகள் கூடுதலாக 99 தொகுதிகள் முன்னேறியிருப்பதாக தெரிவிக்கப்பட்டுள்ளது.

அதேபோல் தேர்தலுக்கு முந்தைய கருத்து கணிப்பில் மக்கள் நல கூட்டணிக்கு ஒரு தொகுதி கூட கிடைக்காது என தெரிவிக்கப்பட்டிருந்தது. ஆனால் எக்ஸிட் போலில் உளுந்தூர்பேட்டை, தளி மற்றும் பவானிசாகர் ஆகிய 3 தொகுதிகளில் வெல்லும் என கூறப்பட்டுள்ளது.

மேலும் தேர்தலுக்கு முந்தைய சர்வேயில் பாமகவுக்கு 1 தொகுதி கிடைக்கும் என்று கூறிய தந்திடிவி எக்ஸிட் போலில் பென்னாகரம் மற்றும் ஆர்க்காடு ஆகிய 2 தொகுதிகளில் அக்கட்சி வெல்லும் என தெரிவித்துள்ளது.

அத்துடன் சர்வேயில் பாஜகவுக்கு 1 தொகுதி கூட கிடைக்காது என கூறியிருந்த தந்தி டிவி தற்போது வேதாரண்யம் தொகுதியில் பாஜக வெல்லும் வாய்ப்பு உள்ளது என கூறுகிறது.

ஒட்டுமொத்தமாக தந்தி டிவியின் தேர்தலுக்கு முந்தைய சர்வேயை தற்போதைய எக்ஸிட் போலுடன் ஒப்பிடுகையில் திமுக அதிகபட்சமாக 20 தொகுதிகளில் முன்னேறியிருப்பது அக்கட்சிக்கு சாதகமாக ஒன்றாக தெரிகிறது.

English summary

According to Thanthi TV Exit poll, DMK will get more 20 seat than its Pre poll survey.