தயாநிதிமாறனின் சொத்து மதிப்பு வெறும் ரூ.10 கோடி தானாம்: அசையா சொத்தே இல்லையாம்
சென்னை: நாடாளுமன்ற தேர்தலில் மத்திய சென்னையில் போட்டியிடும் திமுக வேட்பாளரான முன்னாள் மத்திய அமைச்சர் தயாநிதி மாறனின் சொத்தின் மதிப்பு ரூ.10 கோடி ஆகும்.
நாடாளுமன்ற தேர்தலில் மத்திய சென்னையில் திமுக சார்பில் முன்னாள் மத்திய அமைச்சர் தயாநிதி மாறன் போட்டியிடுகிறார். அவர் சென்னை ஷெனாய் நகரில் உள்ள தேர்தல் அலுவலகத்தில் நேற்று வேட்புமனு தாக்கல் செய்தார்.
அப்போது அவர் தனக்கு ரூ.10 கோடி சொத்து இருப்பதாக தெரிவித்தார். அவரது சொத்து விவரம் வருமாறு,
கார்
தயாநிதி மாறனிடம் ஒரேயொரு கார் தான் உள்ளதாம். அதன் மதிப்பு ரூ. 13 லட்சத்து 50 ஆயிரம் ஆகும்.
அசையும் சொத்துக்கள்
தயாநிதி மாறனிடம் ரூ. 6 லட்சத்து 13 ஆயிரத்து 454 மதிப்புள்ள தங்க நகைகள் உள்ளன. வங்கிகளில் வைப்புத் தொகை, சேமிப்பு தொகை, பங்குபத்திர முதலீடு, பங்கு முதலீடு, நிறுவன முதலீடு, எல்.ஐ.சி., அஞ்சலக காப்பீட்டுத் தொகை, அறக்கட்டளைகளில் முதலீடுகள் ஆகியவற்றில் இருந்து கிடைக்கும் வட்டி என்று அவருடைய அசையும் சொத்துக்களின் மதிப்பு ரூ.2 கோடியே 58 லட்சத்து 64 ஆயிரத்து 410 ஆகும்.
மனைவி
தயாநிதிமாறனின் மனைவி பிரியாவிடம் 1745 கிராம் தங்க நகைகள், 15 கிலோ வெள்ளி மற்றும் இதர நகைகள் என்று ரூ. 1 கோடியே 76 லட்சத்து 92 ஆயிரத்து 953 மதிப்புள்ள சொத்துக்கள் உள்ளன.
பிள்ளைகள்
தயாநிதிமாறனின் மகள் திவ்யா பெயரில் ரூ.3 கோடியே 53 லட்சத்து 26 ஆயிரத்து 991 மதிப்புள்ள சொத்துக்களும், மகன் கரண் பெயரில் ரூ. 3 கோடியே 5 லட்சத்து 44 ஆயிரத்து 794 மதிப்புள்ள சொத்துக்களும் உள்ளன.
அசையா சொத்துக்கள்
தயாநிதிமாறனின் அசையும் சொத்துக்களின் மதிப்பு ரூ. 10 கோடியே 94 லட்சத்து 29 ஆயிரத்து 157 ஆகும். அவரிடம் அசையா சொத்துக்களே இல்லை என்று தெரிவித்துள்ளார்.
Click it and Unblock the Notifications
Sign in with Google