Just In

40 பேர் கொண்ட வேட்பாளர் பட்டியலை ஒரே நாளில் அடுத்தடுத்து மூன்று கட்டமாக வெளியிட்ட விஜயகாந்த்

By Mayura Akilan

Updated: Wednesday, April 13, 2016, 21:33 [IST]

சென்னை: தேசிய முற்போக்கு திராவிட கழகத்தின் 2 கட்ட வேட்பாளர் பட்டியல் இன்று வெளியிடப்பட்டுள்ளது. அதுவும் 2 மணிநேரத்தில் 15 பேரை கொண்ட 2 கட்ட வேட்பாளர் பட்டியலை தேமுதிக தலைவர் விஜயகாந்த் வெளியிட்டார். தற்போது 25 பேர் கொண்ட 3 வது வேட்பாளர் பட்டியல் வெளியிடப்பட்டுள்ளது.

சட்டசபைத் தேர்தலுக்கான வாக்குப்பதிவு மே 16ம் தேதி நடைபெறுகிறது. ஏப்ரல் 22ம் தேதி வேட்புமனு தாக்கல் தொடங்குகிறது.

வேட்புமனு தாக்கல் செய்ய இன்னும் 9 தினங்களே உள்ள நிலையில் அதிமுக, பாஜக, பாமக உள்ளிட்ட கட்சிகள் வேட்பாளர் பட்டியலை வெளியிட்டுள்ளன. மக்கள் நலக்கூட்டணி கட்சிகளுடன் தேர்தல் கூட்டணி அமைத்துள்ள தேமுதிக 104 தொகுதிகளில் போட்டியிடுகிறது.

மக்கள் நலக்கூட்டணியில் உள்ள மதிமுக 29 தொகுதிகளிலும், விடுதலை சிறுத்தைகள் 25 தொகுதிகளிலும் கம்யூனிஸ்ட் கட்சிகள் தலா 25 தொகுதிகளிலும் போட்டியிடுகின்றன. கூட்டணியில் உள்ள தமிழ் மாநில காங்கிரஸ் கட்சி 26 தொகுதிகளில் போட்டியிடுகிறது.

எந்தெந்த தொகுதிகளில் யார் யார் போட்டியிடுவது என்பது பற்றி கடந்த சில தினங்களாக ஆலோசனை நடைபெற்றது.

இந்த நிலையில் தேமுதிக இன்று மாலை முதற்கட்ட வேட்பாளர் பட்டியலை விஜயகாந்த் வெளியிட்டார். அதில் விஜயகாந்தின் 5ம் நம்பர் ராசிப்படி முதற்கட்டமாக 5 பேர் அடங்கிய வேட்பாளர் பட்டியல் வெளியானது.