23ம் தேதி தேமுதிக கிறிஸ்துமஸ்.. கேக்– பிரியாணியோடு கொண்டாட்டம்

சென்னை: தேமுதிக சார்பில் டிசம்பர் 23ம் தேதி கிருஸ்துமஸ் பண்டிகை கொண்டாடப்படும் எனப்படும் என தலைவர் விஜயகாந்த் தெரிவித்துள்ளார்.

இது தொடர்பாக இன்று அவர் வெளியிட்டுள்ள அறிக்கையில் கூறியுள்ளதாவது:

பழங்காலத்தில் கண்ணுக்கு கண், பல்லுக்கு பல் என்று வாழ்ந்து வந்த மக்களுக்கு உன் எதிரியையும் அன்பு செய் என்று புதிய அன்பு மார்க்கத்தை உருவாக்கி, மக்கள் ஒருவருக்கொருவர் அன்பு செய்யவும், தங்களிடம் இருப்பதை பிறரோடு பகிர்ந்து கொண்டு, எல்லோரும் சமமாக வாழவும் வழிகாட்டியவர் இயேசு கிறிஸ்து.

அவரது மார்க்கத்தை கடைப்பிடிப்பதுதான் கிறிஸ்துவ மதம். உலகமெங்கும் உள்ள கிறிஸ்தவர்கள் இயேசு கிறிஸ்துவின் பிறந்தநாளை கிறிஸ்துமஸ் விழாவாக கொண்டாடி வருகிறார்கள். எல்லா மதமும் என் மதமே என்ற பரந்த சிந்தனையோடு அனைத்து மதத்தினரின் விழாக்களையும் நாம் வருடந்தோறும் கொண்டாடி வருகிறோம்.

இந்த ஆண்டும் கிறிஸ்துமஸ் நன்னாளை முன்னிட்டு 23ம் தேதி (திங்கட்கிழமை) காலை 10 மணியளவில் தே.மு.தி.க. சார்பில் சென்னை கோயம்பேட்டில் உள்ள தலைமை கழகத்தில் கிறிஸ்துமஸ் விழா கொண்டாடப்படும். இயன்றதை செய்வோம், இல்லாதவருக்கே என்கின்ற நமது கொள்கைப்படி இந்த கிறிஸ்துமஸ் விழாவில் நானும் கலந்து கொண்டு ஏழை, எளிய மக்களுக்கு கிறிஸ்துமஸ் கேக்குகளும், பிரியாணியும் வழங்கவுள்ளேன்.

இந்நிகழ்ச்சியில் பேராயர் எஸ்றா சற்குணம் (நிறுவன தலைவர் - இந்திய சமூக நீதி இயக்கம்) பிரதம பேராயர் - இந்திய சுவிசேஷ திருச்சபைகள் பேராயர் எஸ்.ராஜாசிங் (இணை பேராயர் இ.சி.ஐ. திருச்சபைகள், சென்னை பேராயம்) ஜெ.ஜான் ஆகியோர் கலந்து கொண்டு சிறப்பிக்க உள்ளனர்.

இவ்விழாவில் கழகத்தை சேர்ந்த கிறிஸ்துவ மக்கள் மட்டுமல்லாமல், எல்லா மதத்தினரும் கலந்து கொண்டு, மத நல்லிணக்கத்திற்கும், வகுப்பு ஒற்றுமைக்கும் எடுத்துக்காட்டாக இவ்விழா அமைந்திட அனைவரும் பங்கேற்று சிறப்பிக்கும்படி கேட்டுக் கொள்கிறேன்.

இந்த நன்னாளில் நமது கழக நிர்வாகிகளும், தோழர்களும் தங்களால் இயன்ற அளவிற்கு இனிப்பு மற்றும் கேக்குகள் வழங்கி தாங்கள் தங்கள் பகுதிகளில் கிறிஸ்துவ மக்களோடு இணைந்து கிறிஸ்துமஸ் விழாவை ஆண்டுதோறும் நாம் சிறப்பாக கொண்டாடி வருவதைப் போல் இந்த ஆண்டும் சிறப்பாக கொண்டாட வேண்டுமென்று கேட்டுக் கொள்கிறேன் என்று விஜயகாந்த் வெளியிட்டுள்ள அறிக்கையில் கூறியுள்ளார்.

English summary

DMDK chief Vijayakanth announced that chirstmas will be celebrated at the party head quarters in Chennai on december 23. He will distribute cakes and briyani to the people on that day.