எந்த அணிக்கும் தேமுதிக போகக் கூடாது.. 'பிரார்த்திக்கும்' அதிமுக, இடதுசாரிகள்!

By Mathi

Updated: Monday, January 27, 2014, 19:33 [IST]

Subscribe to Oneindia Tamil

சென்னை: லோக்சபா தேர்தலில் திமுக அணியிலோ அல்லது பாஜக அணியிலோ தேமுதிக சேர்ந்துவிடக் கூடாது என அதிமுக, இடதுசாரி கட்சித் தலைவர்கள் கருதுவதாக கூறப்படுகிறது.

பாஜக அல்லது திமுக அணியில் தேமுதிகவை இணைப்பதற்கு தீவிர முயற்சிகள் நடைபெற்று வருகிறது. தேமுதிக தலைவர் விஜயகாந்தும் பிப்ரவரி 2-ந் தேதி உளுந்தூர்பேட்டை மாநாட்டில் முடிவை அறிவிப்பேன் என்று தெரிவித்துள்ளார்.

அதிமுக- இடதுசாரிகளின் விருப்பம்

அதிமுக- இடதுசாரிகளைப் பொறுத்தவரையில் திமுக அல்லது பாஜக அணிக்கு தேமுதிக போய்விடக் கூடாது என்பதுதான் விருப்பமாம்.

வெற்றி பாதிப்பு

அப்படி திமுக அல்லது பாஜக அணியில் தேமுதிக இடம்பெற்றால் தங்களது வெற்றிக்கு நிச்சயம் பாதிப்பு என்பது அக்கட்சிகளின் கருத்து.

பிடிகொடுக்காத தேமுதிக

திமுக தரப்பில் தேமுதிக கூட்டணி அமைய வேண்டும்.. அமையும் என்பதில் ஸ்டாலின் நம்பிக்கையோடு இருக்கிறார். ஆனால் கருணாநிதிக்கு நம்பிக்கை இல்லையாம். திருச்சி மாநாட்டுக்குள் எப்படியும் விஜயகாந்தை கொண்டு வரும் முயற்சிகள் மும்முரமாக நடைபெறுகிறதாம்...

போராடும் பாஜக

பாரதிய ஜனதா கட்சியும் தேமுதிகவை கூட்டணிக்கு கொண்டுவர பகீரத பிரயத்தனம் செய்கிறது. ஆனாலும் அந்த அணிக்கும் பிடி கொடுக்காமல் இருக்கிறது தேமுதிக. மோடி கலந்து கொள்ள இருக்கும் வண்டலூர் மாநாட்டுக்குள் தேமுதிகவை கொண்டுவருவது என்பதுதான் பாஜகவின் ப்ளான். லகான் இன்னும் தேமுதிக கையில்தான் இருக்கிறது.