கூட்டணி கட்சிக்கு கடையநல்லூர் ஒதுக்கீடு...அதிருப்தியில் அதிமுக, திமுக தொண்டர்கள்

தென்காசி: திமுக கூட்டணியில் இடம் பெற்றுள்ள இந்திய யூனியன் முஸ்லீம் லீக் கட்சியும், அதிமுக கூட்டணியில் இடம் பெற்றுள்ள தமிழ் மாநில முஸ்லீம் லீக் கட்சியும் கடையநல்லூர் தொகுதியில் போட்டியிடுவதால் அதிமுக, திமுக தொண்டர்கள் அதிருப்தில் உள்ளனர்.

தமிழக சட்டசபைக்கு மூன்று அமைச்சர்களையும், ஒரு அரசு கொறடாவையும் கொடுத்த பெருமைக்குரியது கடையநல்லூர் சட்டசபை தொகுதி. அதே நேரத்தில் அதிமுகவும், திமுகவும் இந்த தொகுதியில் நேரடியாக பலமுறை மோதியுள்ளன.

வருகிற சட்டசபை தேர்தலில் கடையநல்லூர் தொகுதியில் போட்டியிட அதிமுக சார்பில் சுமார் 300க்கும் மேற்பட்டோரும் ,திமுக சார்பில் 50க்கும் மேற்பட்டோரும் விருப்ப மனு அளித்திருந்தனர்.

இந்நிலையில் திமுக கூட்டணியில் இடம்பெற்றுள்ள காதர் மொகிதீன் தலைமையிலான இந்திய யூனியன் முஸ்லீம் லீக் கட்சிக்கு இந்த தொகுதி ஒதுக்கப்பட்டுள்ளது. மறுபக்கம் அதிமுகவில் தமிழ் மாநில முஸ்லீம் லீக் கட்சிக்கு இத்தொகுதி ஒதுக்கப்பட்டுள்ளது. இதனால் தங்கள் கட்சி போட்டியிடும் என்று எதிர்பார்த்து இருந்த திமுக, அதிமுக தொண்டர்கள் அதிருப்தியில் உள்ளனர்.

கடையநல்லூர் தொகுதியில் தமிழ் மாநில முஸ்லீம் லீக் கட்சியின் தலைவர் ஷேக் தாவூது போட்டியிடுகிறார். அவர் இரட்டை இலை சின்னத்தில் போட்டியிடுகிறார் என்பது மட்டுமே அதிமுகவினருக்கு சற்று ஆறுதலான செய்தி.

English summary

DMK's IUML and ADMK alliance party TMML is locking their horns in Kadayanallur.