திமுகவில் அதிரடி- 65 மாவட்டங்களாக பிரிப்பு! சென்னை, மதுரை, கோவை 4 மாவட்டங்களானது!!

சென்னை: திமுகவில் கால் நூற்றாண்டுகளுக்கு மேலாக குறுநில மன்னர்களாக கோலோச்சி வந்த மாவட்ட செயலர்களின் ஆதிக்கம் முடிவுக்கு வந்துள்ளது. திமுக நிர்வாக அமைப்பு மொத்தம் 65 மாவட்டங்களாக பிரிக்கப்பட்டுள்ளதாக அறிவிக்கப்பட்டுள்ளது.

லோக்சபா தேர்தலில் திமுக ஒரு இடத்தில் கூட வெல்லவில்லை. திமுகவின் இந்த படுதோல்விக்கு காரணமே 25 ஆண்டுகளுக்கும் மேலாக மாவட்ட செயலாளர்கள் இருப்பவர்கள்தான் என்று பகிரங்கமாக குற்றம்சாட்டப்பட்டது.

தற்போது மொத்தம் 35 மாவட்ட செயலாளர்கள் இருக்கின்றனர். இவர்கள் அனைவர் மீதும் நாள்தோறும் திமுக தலைமைக்கு நூற்றுக்கணக்கான கடிதங்கள் குவிந்தன. ஆனால் மாவட்ட செயலாளர்களுக்கு பொருளாளர் மு.க.ஸ்டாலின் ஆதரவாக இருந்து வந்தார்.

இந்த நிலையில் சென்னையில் ஜூன் 2-ந் தேதி கூடிய திமுக உயர்நிலை செயல்திட்டக் குழுக் கூட்டத்தில் திமுகவை சீரமைக்க ஒரு குழு அமைக்கப்படும் என அறிவிக்கப்பட்டது.

இதன்படி முன்னாள் அமைச்சர் தங்கம் தென்னரசு, கலசப்பாக்கம் திருவேங்கடம், ஒரத்தநாடு ராஜமாணிக்கம், திருத்துறைப்பூண்டி கல்யாண சுந்தரம், ஈரோடு சச்சிதானந்தம், வழக்கறிஞர் கே.எஸ். ராதாகிருஷ்ணன் ஆகியோர் அடங்கிய குழு அமைக்கப்பட்டது. இக்குழு சென்னையில் கூடி விவாதித்தது. இந்தக் குழுவின் கூட்டத்தில் திமுக தலைவர் கருணாநிதி, பொதுச்செயலர் அன்பழகன், ஸ்டாலின் உள்ளிட்டோர் கலந்து கொண்டனர்.

அதன் பின்னர் 150 பக்க பரிந்துரை அறிக்கையை திமுக தலைவர் கருணாநிதியிடம் ஆறு பேர் குழு அளித்தது. இதனடிப்படையில் திமுக 65 மாவட்டங்களாக பிரிக்கப்பட்டுள்ளதாக அறிவிக்கப்பட்டுள்ளது.

65 மாவட்டங்களானது!

சென்னை, மதுரை, கோவை ஆகியவை 4 மாவட்டங்களாகப் பிரிக்கப்பட்டுள்ளன. வடசென்னை, தென் சென்னை என்பது பிரிக்கப்பட்டு கிழக்கு சென்னை, மேற்கு சென்னை, தென் சென்னை, வடசென்னை என 4 ஆக பிரிக்கப்பட்டுள்ளது.

வேலூர், நெல்லை, விழுப்புரம், சேலம் ஆகிய மாவட்டங்கள் மூன்றாக பிரிக்கப்பட்டுள்ளன. திருவள்ளூர், காஞ்சி, கடலூர், நாகை, தஞ்சை, திருச்சி, புதுக்கோட்டை, திண்டுக்கல், நாமக்கல், திருப்பூர் கிருஷ்ணகிரி, விருதுநகர், புதுக்கோட்டை,கன்னியாகுமரி, தூத்துகுடி, உள்ளிட்டவை இரண்டு மாவட்டங்களாகப் பிரிக்கப்படுகின்றன.

பெரம்பலூர், சிவகங்கை ,நீலகிரி, திருவாரூர், கரூர், தேனி, தருமபுரி, அரியலூர், ராமநாதபுரம் உள்ளிட்ட சில மாவட்ட அமைப்புகள் பிரிக்கப்படவில்லை.

English summary

The DMK has announced the bifurcated of its district units, it will have from 35 to 65 district units.