திமுக தலைவர் மு.கருணாநிதியின் பிறந்த நாள் கொண்டாட்டம்... திருவாரூரில் கோலாகலமாக தொடங்கியது
திமுக தலைவர் மு.கருணாநிதியின் 95-வது பிறந்த நாள் கொண்டாட்டம் தற்போது திருவாரூரில் நடந்து வருகிறது.
திருவாரூர்: திமுக தலைவர் மு.கருணாநிதியின் 95-வது பிறந்த நாள் கொண்டாட்ட விழா தற்போது திருவாரூரில் நடந்து வருகிறது.
திமுக தலைவர் மு.கருணாநிதியின் 95-வது பிறந்த நாள் ஜூன் 3-ம் தேதி வருகிறது. இவர் நாகை மாவட்டம் திருக்குவளையில் 1924ம் ஆண்டு பிறந்தார். இந்த பிறந்த நாளை கொண்டாட திமுக தொண்டர்கள் ஒருவாரம் முன்பே தயாராகிவிட்டனர். எப்போதும் போல இந்த முறையும் கோலாகலமாக விழாவை கொண்டாட முடிவு செய்துள்ளனர்.
இந்த முறை திமுக தலைவர் கருணாநிதியின் பிறந்த நாள் விழா திருவாரூரில் நடக்கிறது. இந்த விழா தற்போது தொடங்கியுள்ளது. திமுக பொதுச்செயலாளர் அன்பழகன் விழாவிற்கு தலைமை தாங்குகிறார்.
உடல்நிலை காரணமாக கருணாநிதி விழாவில் கலந்து கொள்ளவில்லை. மு.க.ஸ்டாலின், துரைமுருகன் ஆகியோர் விழாவில் முன்னிலை வகிக்கிறார்கள். இந்த விழாவில் லட்சக்கணக்கான திமுக தொண்டர்கள் கலந்து கொண்டு இருக்கிறார்கள். தமிழகத்தின் பல பகுதிகளில் இருந்து தொண்டர்கள் திருவாரூர் வந்துள்ளனர்.
கி.வீரமணி, திருநாவுக்கரசர், வைகோ, காதர் மொய்தீன், கே.பாலகிருஷ்ணன், முத்தரசன், திருமாவளவன், ஜவாஹிருல்லா ஆகியோர் விழாவில் கலந்து கொண்டுள்ளனர். அதேபோல் திமுகவின் தோழமை கட்சியின் தொண்டர்களும் விழாவில் கலந்து கொண்டுள்ளனர்.
கி.வீரமணி தொடங்கி வரிசையாக எல்லா தலைவர்களும் கருணாநிதி குறித்தும், அவருடன் பழகிய அரசியல் அனுபவங்கள் குறித்தும் பகிர்ந்து கொண்டனர். இன்னும் பல தலைவர்கள் இந்த விழாவில் பேச உள்ளனர். பிறந்த நாள் முடியும் வரை தமிழகத்தின் பல்வேறு பகுதிகளில் திமுக இப்படி விழா நடத்த உள்ளது.