திமுக பொதுக்குழு இன்று கூடுகிறது.. ஸ்டாலினுக்கு செயல் தலைவர் பதவி?

திமுக பொதுக்குழு இன்று காலை சென்னையில் நடைபெறுகிறது. இதில் திமுக செயல் தலைவராக ஸ்டாலின் நியமிக்கப்படுவாரா என்ற எதிர்பார்ப்பு உள்ளது.

By Karthikeyan

Published: Wednesday, January 4, 2017, 0:52 [IST]

Subscribe to Oneindia Tamil

சென்னை: திமுக பொதுக்குழு கூட்டம் இன்று காலை அண்ணா அறிவாலயத்தில் கூடுகிறது. இக்கூட்டத்தில் திமுக பொருளாளர் ஸ்டாலின் செயல் தலைவராக அறிவிக்கப்படுவாரா? என்ற எதிர்பார்ப்பு எழுந்துள்ளது.

திமுக தலைவர் கருணாநிதி தலைமையில் அக்கட்சியின் பொதுக்குழுக் கூட்டம் கடந்த டிசம்பர் 20-ம் தேதியன்று நடைபெறும் என அறிவிக்கப்பட்டிருந்தது. ஆனால், கருணாநிதி உடல்நலக் குறைவு காரணமாக மருத்துவமனையில் அனுமதிக்கப்பட்டு சிகிச்சை பெற்று வந்ததால் பொதுக்குழுக் கூட்டம் ஒத்தி வைக்கப்பட்டது.

இதனிடையே இன்று காலை 9 மணியளவில் அண்ணா அறிவாலயத்தில் பொதுக்குழு கூட்டம் நடைபெறும் என்று அக் கட்சியின் பொதுச்செயலர் அன்பழகன் அறிவித்திருந்தார். அதன்படி.சென்னை அண்ணா அறிவாலயத்தில் திமுக பொதுக்குழு இன்று கூடுகிறது. இக்கூட்டத்தில் திமுக தலைவர் கருணாநிதி பங்கேற்பாரா என்பது சந்தேகம்தான். மருத்துவர்களின் அறிவுறுத்தலைத் தொடர்ந்து ஓய்வில் இருந்து வருகிறார் கருணாநிதி.

இப்பொதுக் குழுவில் சுமார் 3,000 க்கும் மேற்பட்ட உறுப்பினர்கள் கலந்துகொள்கின்றனர். இதில் கட்சிக்கு தலைமையேற்று வழிநடத்தும் வகையில் ஸ்டாலினுக்கு செயல் தலைவர் அல்லது துணைத் தலைவர் பதவி வழங்கப்படும் வகையில் தீர்மானம் கொண்டுவரப்பட உள்ளதாகவும் திமுக வட்டாரங்கள் கூறுகின்றன.

அதேநேரத்தில் கருணாநிதி மகளும் ராஜ்யசபா எம்பியுமான கனிமொழி, தமக்கு துணைப் பொதுச்செயலர் பதவி தர வலியுறுத்தி வருகிறார். மேலும் திமுகவில் இருந்து நீக்கப்பட்ட கருணாநிதியின் மகன் அழகிரி தம்மை மீண்டும் கட்சியில் சேர்த்து தென்மண்டல அமைப்பு செயலர் பதவியை தரவும் நெருக்கடி கொடுத்து வருகிறார். இது தொடர்பாகவும் திமுக பொதுக்குழு விவாதித்து முடிவெடுக்கும் என தகவல்கள் வெளியாகியுள்ளன.

மேலும் தமிழகத்தில் நிலவும் வறட்சி, விவசாயிகளின் தொடர் தற்கொலைகள், வர்தா புயல் இழப்பீடு உள்ளிட்ட முக்கிய பிரச்சனைகள் குறித்தும் அரசியல் நிகழ்வுகள் குறித்த முக்கிய தீர்மானங்களும் நிறைவேற்றப்பட உள்ளதாக தகவல்கள் தெரிவிக்கின்றன.

Published On January 4, 2017