கருணாநிதிக்கு இன்று 93-வது பிறந்த நாள்: உற்சாகமாக கொண்டாட திமுகவினர் ஏற்பாடு
சென்னை: திமுக தலைவர் கருணாநிதியின் 93-வது பிறந்த நாள் இன்று கொண்டாடப்படுகிறது. இதையொட்டி பல்வேறு நிகழ்ச்சிகளுக்கு திமுகவினர் ஏற்பாடு செய்துள்ளனர்.
திமுக தலைவர் கருணாநிதி கடந்த 1924-ம் ஆண்டு ஜூன் மாதம் 3-ம் தேதி திருவாரூர் மாவட்டம் திருக்குவளையில் பிறந்தார். இளம் வயது முதல் பொது வாழ்வில் அவர் ஈடுபட்டு வருகிறார். அவருக்கு இன்று 92 வயது முடிந்து 93-வது வயது பிறக்கிறது.
அவரது பிறந்தநாளையொட்டி கடந்த சில நாட்களாக பல்வேறு நிகழ்ச்சிகளை திமுகவினர் நடத்தி வருகின்றனர். இந்நிலையில், கருணாநிதி, இன்று காலை 7 மணிக்கு சென்னை மெரினா கடற்கரையில் உள்ள அண்ணா நினைவிடத்தில் மலர்வளையம் வைத்து மரியாதை செலுத்துகிறார்.
இதன் பின்னர் வேப்பேரியில் உள்ள பெரியார் நினைவிடத்திலும் மரியாதை செலுத்துகிறார்.அதைத் தொடர்ந்து காலை 9 மணி முதல் திமுக தலைமை அலுவலகமான அண்ணா அறிவாலயத்தில் உள்ள கலைஞர் அரங்கில் தொண்டர்கள், கட்சி நிர்வாகிகள், முக்கிய பிரமுகர்களைச் சந்தித்து வாழ்த்து பெறுகிறார்.
மாலை 6 மணிக்கு சென்னை, ராயப்பேட்டை ஒய்எம்சி மைதானத்தில் திமுக சார்பில் ஏற்பாடு செய்யப்பட்டுள்ள பொதுக் கூட்டத்தில் கலந்து கொண்டு கருணாநிதி உரையாற்றுகிறார்.