மக்கள் நலக் கூட்டணியை உடைக்க முயற்சிக்கிறதா திமுக?- முக ஸ்டாலின்

சென்னை: மக்கள் நலக் கூட்டணியை உடைக்க திமுக முயற்சிப்பதாக வரும் குற்றச்சாட்டுகளில் உண்மையில்லை என்று திமுக பொருளாளர் மு.க.ஸ்டாலின் கூறினார்.

சென்னை விமான நிலையத்தில் ஞாயிற்றுக்கிழமை அவர் நிருபர்களுக்கு அளித்த பேட்டி:

கேள்வி: மக்கள் நல கூட்டணியை உடைக்க திமுக சதி செய்வதாக இந்திய கம்யூனிஸ்ட் கூறியுள்ளதே?

பதில்: மக்கள் நலக் கூட்டணி தலைவர்களுக்கு பிரசாரம் செய்வதற்கும், பேசுவதற்கும் வேறு எதுவும் இல்லை என்பதால் அப்படி பிரசாரம் செய்து வருகின்றனர். அவர்கள் குற்றச்சாட்டில் எந்த உண்மையும் இல்லை.

கேள்வி: திமுக - காங்கிரஸ் தொகுதி பங்கீடு பேச்சு எப்போது தொடங்கும்?

பதில்: தொகுதிப் பங்கீடு பற்றி பேச திமுக ஒரு குழுவை அமைத்து உள்ளது. காங்கிரஸும் ஒரு குழுவை அமைக்க உள்ளது. இரு குழுக்களும் பேசி முடிவு எடுக்கப்படும்.

கேள்வி: திமுக தேர்தல் அறிக்கை எப்போது வெளியிடப்படும்?

பதில்: தேர்தல் அறிக்கை தயாராகி வருகிறது. அது முழுமை அடைந்ததும் வெளியிடப்படும்.

English summary

DMK Treasurer MK Stalin says that his party never tries to break Vaiko's Makkal Nala Koottani.