இ.கம்யூனிஸ்ட் கட்சியின் மூத்த தலைவர் நல்லகண்ணுவுடன் தமிழக காங். தலைவர் இளங்கோவன் சந்திப்பு!

By Mathi

Updated: Thursday, November 13, 2014, 19:13 [IST]

Subscribe to Oneindia Tamil

சென்னை: இந்திய கம்யூனிஸ்ட் கட்சியின் மூத்த தலைவர் நல்லகண்ணுவை தமிழக காங்கிரஸ் கமிட்டியின் தலைவர் ஈ.வி.கே.எஸ். இளங்கோவன் இன்று சந்தித்துப் பேசினார்.

EVKS Elangovan meets Senior CPI leader Nallakannu

தமிழ்நாடு காங்கிரஸ் கமிட்டி தலைவராகப் பொறுப்பேற்ற இளங்கோவன் கடந்த 9-ந் தேதி திமுக தலைவர் கருணாநிதியை அவரது இல்லத்தில் சந்தித்து வாழ்த்துப் பெற்றார்.

இதுகுறித்து கருத்துத் தெரிவித்த இளங்கோவன், திராவிட இயக்கத்தின் மூத்த தலைவர் என்ற முறையில் கருணாநிதியைச் சந்தித்து வாழ்த்து பெற்றேன்.

அதிமுக பொதுச் செயலாளர் ஜெயலலிதா அனுமதி தந்தால் அவரையும் சந்திப்பேன். விரைவில் மார்க்சிஸ்ட் கம்யூனிஸ்ட் கட்சியின் மூத்த தலைவர் என். சங்கரய்யா, இந்திய கம்யூனிஸ்ட் கட்சியின் மூத்த தலைவர் ஆர். நல்லகண்ணு ஆகியோரையும் சந்தித்து வாழ்த்துப் பெறுவேன் எனத் தெரிவித்திருந்தார்.

இதனைத் தொடர்ந்து சென்னை தியாகராயர் நகரில் உள்ள மார்க்சிஸ்ட் கம்யூனிஸ்ட் கட்சியின் மாநிலக் குழு அலுவலகத்துக்கு இளங்கோவன் நேற்று சென்று மூத்த தலைவர் சங்கரய்யாவை சந்தித்துப் பேசினார்.

பின்னர் இன்று பகல் 12 மணிக்கு இந்திய கம்யூனிஸ்ட் கட்சியின் அலுவலகத்தில் மூத்த தலைவர் நல்லகண்ணுவை சந்தித்து வாழ்த்து பெற்றார். மரியாதை நிமித்தமாக நல்லகண்ணுவை சந்தித்தாக இளங்கோவன் தெரிவித்தார்.