ஜெயலலிதா உடம்புக்கு என்ன ஆச்சு.. கவலையாக இருக்கிறது: ஈவிகேஎஸ் இளங்கோவன்

சென்னை: முதல்வர் ஜெயலலிதாவின் உடல் நலம் மீது எனக்கும் அக்கறை உள்ளது. அவரது உடலுக்கு என்ன என்பது குறித்து தமிழக அரசு பகிரங்கமாக தெரிவிக்க வேண்டும் என்று தமிழக காங்கிரஸ் தலைவர் ஈவிகேஎஸ் இளங்கோவன் கூறியுள்ளார்.

முதல்வர் ஜெயலலிதாவின் உடல் நலம் குறித்து பல்வேறு செய்திகள் பரவி வருகின்றன. அவருக்கு சிறுநீரக கோளாறு என்று வாட்ஸ் ஆப்பி்ல் தகவல் பரவி வருகிறது. சர்க்கரை நோய் அதிகரித்து விட்டதாக கூறுகிறார்கள். அவரால் நடக்க முடியாத அளவுக்கு மூட்டு வலி அதிகரித்துள்ளதாகவும் தகவல்கள் கூறுகின்றன.

இந்த நிலையில் முதல்வரின் உடல் நலம் குறித்து அரசியல் தலைவர்கள் மத்தியிலும் ஒரு விதமான பரபரப்பு காணப்படுகிறது. இன்று செய்தியார்களைச் சந்தித்த காங்கிரஸ் தலைவர் ஈவிகேஎஸ் இளங்கோவனிடம் செய்தியாளர்கள் இதுகுறித்துக் கேட்டனர்.

அப்போது இளங்கோவன் கூறுகையில், முதல்வர் ஜெயலலிதாவின் உடல் நலம் குறித்து மருத்துவ அறிக்கை வெளியிட வேண்டும். முதல்வர் ஜெயலலிதாவின் உடல் நலம் குறித்து எனக்கும் அக்கறை உள்ளது என்றார் இளங்கோவன்.

மத்திய அமைச்சர் பொன் ராதாகிருஷ்ணன், காமராஜப் பெயரைச் சொல்ல உங்களுக்கு அருகதை இல்லை என்று கூறியுள்ளாரே என்ற கேள்விக்கு இளங்கோவன் பதிலளிக்கையில், காமராஜர் பிறந்த நாளை கொண்டாடி ஊரை ஏமாற்றுகிறது பாஜக என்று பட்டென்று பதிலளித்தார் இளங்கோவன்.

English summary

TNCC president EVKS Elangovan has urged the TN Govt to come out with a statement on CM Jayalalitha's health condition