திமுகவில் செயல் தலைவராகும் மு.க.ஸ்டாலின்! பொருளாளர் பதவிக்கு கடும் போட்டி!!

சென்னை: திமுக பொருளாளராக இருக்கும் மு.க.ஸ்டாலினுக்கு விரைவில் துணைத் தலைவர் அல்லது செயல் தலைவர் பதவி வழங்கப்பட இருப்பதாகத் தெரிகிறது. இதனால் ஸ்டாலினின் பொருளாளர் பதவியைப் பெறுவதில் கட்சியில் பெரும் போட்டி நிலவுகிறது.

திமுகவில் ஸ்டாலினுக்கு முதலில் பொதுச்செயலர் பதவி வழங்க தீர்மானிக்கப்பட்டது. ஆனால் நீண்டகால பொதுச்செயலரான அன்பழகன், தமது பதவியை விட்டுத்தர முன்வரவில்லை.

இதனால் ஆற்காடு வீராசாமி வசம் இருந்த பொருளாளர் பதவி, ஸ்டாலினுக்கு கொடுக்கப்பட்டது. தற்போது திமுகவில் ஸ்டாலினுக்கு துணைத் தலைவர் அல்லது செயல் தலைவர் என்ற பதவி வழங்க முடிவு செய்யப்பட்டுள்ளது.

அப்படி ஸ்டாலினுக்கு புதிய பதவி வழங்கப்பட்டால் பொருளாளர் பதவியை தனக்கு வாங்கிவிடுவது என்பதில் துணை பொதுச்செயலர் துரைமுருகன் வரிந்து கட்டிக் கொண்டிருக்கிறாராம். கருணாநிதி தமக்கே அப்பதவியை பெற்றுத் தருவார் என மலைபோல நம்பிக் கொண்டிருக்கிறாராம்.

ஆனால் திண்டுக்கல் ஐ.பெரியசாமியை சில மாவட்ட செயலர்கள் முன்னிறுத்துகிறார்களாம். ஐ. பெரியசாமியும் தனது மகனை மாவட்ட செயலராக்கிவிட்டு மாநில பொறுப்புக்கு சென்றே தீருவேன் என்று சபதம் போட்டிருக்கிறாராம்.

அதே நேரத்தில் ஐ.பெரியசாமிக்கு இந்த பதவி கிடைக்கக் கூடாது என்று சில மாவட்ட செயலர்கள் லாபியில் ஈடுபட்டும் வருகின்றனராம்.

English summary

Senior DMK leaders Durai Murugan and I Periyasamy try to get the MK Stalin's treasurer post, sources said.