கொடைக்கானல் டூர் போறீங்களா? இதான் சரியான நேரம்.. சுற்றுலா இடங்களுக்குச் செல்ல 2 நாட்களுக்கு இலவசம்!
திண்டுக்கல்: கொடைக்கானலில் இன்றும் (மே 2), நாளையும் (மே 3) வனத்துறை சுற்றுலா இடங்களை இலவசமாக சுற்றிப் பார்க்கலாம் என அறிவிக்கப்பட்டுள்ளது. தூண் பாறை, குணா குகை, பைன் மரக்காடுகள், மோயர் சதுக்கம் ஆகிய இடங்களுக்கு கட்டணமின்றி செல்லலாம்.
கோடை காலம் தொடங்கியதால் கொடைக்கானலுக்கு சுற்றுலா பயணிகள் அதிக அளவில் வர தொடங்கியுள்ளனர். குளிர்ச்சியான காலநிலை, பசுமையான காடுகள், அழகிய இயற்கை காட்சிகளால் சுற்றுலா பயணிகளை கொடைக்கானல் கவர்ந்து வருகிறது. கோடை காலத்தில் வெப்பத்தில் இருந்து தப்பிக்க மக்கள் அதிகமாக இங்கு வருகை தருகின்றனர்.
திண்டுக்கல் மாவட்டம் கொடைக்கானலில் உள்ள அனைத்து வனத்துறை சுற்றுலா இடங்களுக்கும் ஒரே இடத்தில் 'க்யூஆர்' கோடு மூலம் நுழைவு கட்டணம் வசூலிக்கப்பட்டு வருகிறது. இந்த நடைமுறையால் பசுமை பள்ளத்தாக்கு பகுதியில் கடும் போக்குவரத்து நெரிசல் ஏற்படுகிறது.
இதற்கு எதிர்ப்பு தெரிவித்தும், வனத்துறை சுற்றுலா இடங்களுக்கு அந்தந்த இடத்திலேயே தனியாக நுழைவு கட்டணம் வசூலிக்க வேண்டும் என வலியுறுத்தி, வெள்ளிக்கிழமை காலை முதல் கொடைக்கானலில் உள்ள சுற்றுலா வாகன ஓட்டுநர்கள் போராட்டத்தில் ஈடுபட்டு வருகின்றனர்.
இந்நிலையில் இன்றும் (மே 2), நாளையும் (மே 3) வனத்துறை சுற்றுலா இடங்களை இலவசமாக சுற்றி பார்க்கலாம் என திண்டுக்கல் மாவட்ட ஆட்சியர் சரவணன் அறிவித்துள்ளார். தூண்பாறை, குணா குகை, பைன் மரக்காடுகள் மற்றும் மோயர் சதுக்கம் போன்ற இடங்களுக்கு எந்த கட்டணமும் இல்லாமல் செல்ல அனுமதி வழங்கப்பட்டுள்ளது.
இது தொடர்பாக திண்டுக்கல் மாவட்ட ஆட்சியர் சரவணன் கூறுகையில், "கொடைக்கானலில் அதிகரித்து வரும் சுற்றுலாப் பயணிகளின் எண்ணிக்கையை கருத்தில் கொண்டு வனத்துறை கட்டுப்பாட்டில் உள்ள சுற்றுலா இடங்களுக்கு மே 2 மற்றும் மே 3 ஆகிய 2 நாட்களும் கட்டணமின்றி இலவசமாக சுற்றி பார்க்கலாம்.
மேலும், சுற்றுலாப் பயணிகளின் வசதிக்காக, வனத்துறை சுற்றுலா இடங்களுக்கான நுழைவு சீட்டு, கொடைக்கானல் பேருந்து நிலையம், பிரையன்ட் பூங்கா, கோக்கர்ஸ் வாக் உள்ளிட்ட 5 இடங்களில் வனத்துறை மூலம் வழங்க ஏற்பாடு செய்யப்பட்டுள்ளது. 'க்யூஆர்' குறியீடு மூலம் வரிசையில் நிற்காமல் உடனடியாக டிக்கெட் பெறும் நடைமுறை மே 4 ஆம் தேதி முதல் செயல்படுத்தப்படும்." என்று தெரிவித்துள்ளார்.
Click it and Unblock the Notifications
Sign in with Google