இது தங்க ஹெல்மெட்!… கோவை நகைப்பட்டறை தொழிலாளி சாதனை
கோவை: வடச்சட்டி ஹெல்மெட், மண்சட்டி ஹெல்மெட்தானே பார்த்திருப்பீர்கள்... தங்கத்தில் மைக்ரோ ஹெல்மெட் தயாரித்து அசத்தியுள்ளார் கோவையைச் சேர்ந்த நகை பட்டறை தொழிலாளி. இரு சக்கர வாகனத்தில் செல்வோர் ஹெல்மெட் அணிய வேண்டிய அவசியத்தை வலியுறுத்தி, விழிப்புணர்வு ஏற்படுத்தும் வகையில் இதனை தயாரித்துள்ளார்.
கோவை, செட்டி வீதி, அசோக் நகரைச் சேர்ந்தவர் மாரியப்பன். நகை பட்டறை தொழிலாளியான இவர், மைக்ரோ அளவில் நகைகளை வடிவமைப்பதில் ஆர்வம் கொண்டவர். இவர் தமிழக அரசு ஹெல்மெட் அணிவதை கட்டாயமாக்கியுள்ள நிலையில், தற்போது மைக்ரோ அளவில் ஹெல்மெட்டை வடிவமைத்துள்ளார் மாரியப்பன். 250 மில்லி கிராமில் (கால் கிராம்) ஹெல்மெட் தயாரித்துள்ள இவர், அனைவரும் ஹெல்மெட் அணிய வேண்டும் என்பதற்கான விழிப்புணர்வுக்காக இதை வடிவமைத்துள்ளதாக கூறுகிறார்.
இது தொடர்பாக செய்தி நிறுவனம் ஒன்றிர்க்கு பேட்டியளித்துள்ள மாரியப்பன், "மைக்ரோ அளவில் நகைகள் வடிவமைப்பதில் எனக்கு மிகுந்த ஆர்வம். அதன் காரணமாக அவ்வப்போது இதுபோன்ற முயற்சிகளில் ஈடுபட்டு வருகிறேன். அனைவரும் தரமான ஹெல்மெட் அணிய வேண்டும் என்பதை வலியுறுத்தியும், ஹெல்மெட்டின் அவசியம் குறித்து விழிப்புணர்வு ஏற்படுத்த இதை வடிவமைத்துள்ளேன்" என்று கூறியுள்ளார்.
இது போன்ற மைக்ரோ அளவிலான வடிவமைப்புகளை அதிகபட்சம் ஒரே நாளில் தயாரித்து விடுவேன் என்று மாரியப்பன் கூறியுள்ளார். இவர் ஏற்கனவே 4 முறை மைக்ரோ ஹெல்மெட் தயாரிக்க முயன்று, 5வது முறை இந்த ஹெல்மெட்டை மாரியப்பன் தயாரித்துள்ளார்.
உலகக் கோப்பை கிரிக்கெட்டின் போது 100 மில்லி கிராமில் உலக கோப்பையின் மாதிரியையும், கோவை கோணியம்மன் கோவில் திருவிழாவின் போது 2 கிராம் தங்கத்தில் கோணியம்மன் கோவில் தேர் மாதிரியையும், சி.எஸ்.ஐ. சர்ச் நூற்றாண்டு விழாவின்போது 5 கிராமில் சர்ச் மாதிரியையும் மைக்ரோ அளவில் வடிவமைத்து சாதனை படைத்துள்ளார் மாரியப்பன்.
Click it and Unblock the Notifications
Sign in with Google