ஹாலிவுட் படத்திற்கு நிகராக இந்திய சினிமாவிற்கு வரி விதிப்பதா? - கமல்ஹாசன்

ஹாலிவுட் படத்திற்கு நிகராக இந்திய சினிமாவிற்கு ஜிஎஸ்டி வரி விதிக்கக் கூடாது என்று நடிகர் கமல்ஹாசன் கூறியுள்ளார்.

சென்னை: சினிமா என்பது சூதாட்டம் அல்ல.. அது ஒரு கலை. ஹாலிவுட் படங்களுக்கு நிகராக 28 சதவிகிதம் வரி விதிப்பது தேவையற்றது என்று நடிகர் கமல்ஹாசன் கூறியுள்ளார். இந்தி சினிமாவையும், தமிழ் சினிமாவையும் ஒரே அளவுகோலில் பார்க்கக்கூடாது என்றும் அவர் மத்திய அரசிடம் கேட்டுக்கொண்டுள்ளார்.

நாடு முழுக்க ஒரே மாதிரி வரி விதிப்பான ஜிஎஸ்டி ஜூலை 1ம் தேதி முதல் அமலுக்கு வர உள்ளது. சினிமாவிற்கு 28% வரி விதிக்க முடிவு செய்யப்பட்டுள்ளது. எந்த மொழி திரைப்படமாக இருந்தாலும், என்ன தலைப்பாக இருந்தாலும், ஒரே மாதிரி 28 சதவீதம் வரி விதிக்கப்படும்.

இதற்கு தமிழ் திரைப்படத்துறையினர் எதிர்ப்பு தெரிவித்து வருகின்றனர். இன்று தென்னிந்திய திரைப்பட வர்த்தக சபையில் நடிகர் கமல்ஹாசன் செய்தியாளர்களிடம் பேசினார். அப்போது அவர், சூதாட்டமும், சினிமாவும் ஒன்றல்ல வேறு வேறு. திரைப்படம் ஒரு கலை என்று கூறினார்.

தேச ஒற்றுமையை வரவேற்கிறோம் அதே நேரத்தில் தமிழ் சினிமாவை இந்தி சினிமாவுடன் ஒப்பிட முடியாது. சினிமாவை தவறாகும், சரியாகவும் பயன்படுத்திய அரசியல் தலைவர்கள் உள்ளனர். பிறந்தது முதல் சினிமாவில்தான் இருக்கிறேன். எனக்கு சினிமாதான் வாழ்க்கை. நான் பேசக்கற்றுக்கொண்டதே சினிமாவில்தான்.

திரை துறையினரை நம்பி ஏராளமானோர் உள்ளனர். ஜிஎஸ்டி வரியோடு நாங்கள் வருமான வரியும் கட்டவேண்டும். ஜிஎஸ்டி வரி விதிப்பு விவகாரம் குறித்து அரசு மறுபரிசீலனை செய்ய வேண்டும் என்று கமல்ஹாசன் தெரிவித்தார்.

English summary

The government’s decision to put cinema tickets under the 28 per cent tax bracket in the Goods and Services Tax (GST) regime is a major setback for the film industry,said Actor Kamal hassan. We are one of the only local film industries in the world to have thus far withstood the onslaught of Hollywood said Kamal.