பெட்ரோல் டீசல் விலை உயர்வை திசை திருப்பவா எச் ராஜா விவகாரம்?

Updated: Tuesday, September 18, 2018, 10:49 [IST]

Subscribe to Oneindia Tamil

சென்னை: பெட்ரோல் டீசல் விலை உயர்வை திசை திருப்புவதற்காக எச் ராஜா விவகாரம் எழுப்பப்படுகிறதா என்ற கேள்வி எழுந்துள்ளது.

கடந்த 2014-ஆம் ஆண்டு மக்களவை தேர்தலில் போட்டியிட்ட பாஜக அரசு, காங்கிரஸ் அரசால் நிகழ்ந்த விலையேற்றங்கள் குறைக்கப்படும் என்று தேர்தல் வாக்குறுதியாக கொடுத்தது. ஆனால் தற்போது நிலைமை தலைகீழ், காங்கிரஸ் ஆட்சியின் போது ஒரு லிட்டர் பெட்ரோலின் விலை ரூ. 76 ஆக இருந்தது.

ஆனால் இன்றைய நிலவரப்படி சென்னையில் ஒரு லிட்டர் பெட்ரோல் விலை ரூ 85-க்கு விற்கப்படுகிறது. இதனால் சாமானிய மக்கள் கடும் கொந்தளிப்பில் உள்ளனர்.

இந்திய ரூபாய் மதிப்பு

கடந்த ஏப்ரல் மாதம் ரூ76.84 காசாக பெட்ரோல் விலை இருந்தது. கடந்த சில நாட்களாக கடும் விலையுயர்வு ஏற்பட்டுள்ளது. இதற்கு டாலருக்கு எதிராக இந்திய ரூபாயின் மதிப்பு குறைந்தது என கூறப்படுகிறது.

எச் ராஜா விவகாரம்

நாட்டில் பெட்ரோல் டீசல் விலை நாளுக்கு நாள் உயர்ந்து வருவது குறித்து பாஜக அரசுக்கு எதிராக கடும் எதிர்ப்பு கிளம்பியுள்ளது. எனவே இதுபோன்ற சம்பவங்களை பொதுமக்கள் மறந்தால் மட்டுமே 2019-ஆம் ஆண்டு நடைபெறும் பொதுத் தேர்தலில் சோபிக்க முடியும் என்பதால் மத்திய பாஜக அரசு பிளான் செய்து எச் ராஜாவை விட்டு சர்ச்சைக்குரிய வகையில் பேச வைத்துள்ளதோ என்ற சந்தேகம் எழுந்துள்ளது.

பாஜக ஸ்டைல்

பொதுவாக எந்த பிரச்சினையாக இருந்தாலும் அதை மறக்கடிக்க இன்னொரு பிரச்சினையை உருவாக்குவது பாஜகவின் ஸ்டைல் என்று கூறப்படுகிறது. தூத்துக்குடி துப்பாக்கிச் சூட்டை மறக்கடிக்கவே சமூக விரோதி என ரஜினியை விட்டு பேச வைத்ததாகவும் சில தகவல்கள் கூறுகின்றன.

குளிர்காயும் பாஜக

அது போல் கமல்ஹாசன் கடந்த ஆண்டு நவம்பர் மாதம் 3-ஆம் தேதி கட்சி தொடங்குவார் என்று எதிர்பார்க்கப்பட்ட நேரத்தில் அவருக்கு மக்கள் மத்தியில் உள்ள ஆதரவை மறக்கடிக்க மெர்சல் திரைப்பட விவகாரத்தை எச் ராஜாவும் தமிழிசையும் விடாபிடியாக பிடித்துக் கொண்டனர் என்றும் கூறியது உண்டு. எனவே ஹைகோர்ட் மற்றும் போலீஸுக்கு எதிராக எச் ராஜாவை பேசவிட்டு அதில் குளிர் காய நினைக்கிறது பாஜக.