பொது சிவில் சட்டத்தை குஷ்பு ஆதரிப்பதை வரவேற்கிறேன் - ஹெச்.ராஜா

காங்கிரஸ் கட்சியை சேர்ந்த குஷ்பு பொது சிவில் சட்டத்திற்கு ஆதரவு தெரிவித்துள்ளதை பாஜக தேசிய செயலாளர் ஹெச்.ராஜா வரவேற்றுள்ளார்.

மதுரை: பொது சிவில் சட்டத்தை காங்கிரஸ் கட்சியைச் சேர்ந்த குஷ்பு ஆதரிப்பதை வரவேற்பதாக பாஜக தேசிய செயலாளர் ஹெச்.ராஜா தெரிவித்துள்ளார்.

திருப்பரங்குன்றம் இடைத்தேர்தலில் போட்டியிடும் பாஜக வேட்பாளர் சீனிவாசனை பத்திரிகையாளர்களுக்கு ஹெச்.ராஜா அறிமுகம் செய்து வைத்து பேசியதாவது: சிமி போன்ற பயங்கரவாதிகளின் செயல்பாடுகளை கண்டிக்காமல், அந்தத் தீவிரவாதிகளை என்-கவுண்டர் செய்த விசயத்தை பெரிதுபடுத்த நினைக்கும் இவர்கள்தான் தேசவிரோத சக்திகள்.

இது போன்ற அமைப்புகளுக்குப் பயந்து அல்லது கையூட்டு வாங்கிக் கொண்டே இவ்வாறு செயல்படுகிறார்கள் என பகிரங்கமாகக் குற்றம் சாட்டுகிறேன். பொதுசிவில் சட்டத்தைப் பொறுத்தவரை, இந்தியாவிலுள்ள அனைத்து மதத்தினரும் சமமாகக் கருதப்பட வேண்டும் என்ற அடிப்படையில் பாஜக இதற்கு முயற்சி எடுக்கிறது.

காங்கிரஸ் கட்சியைச் சேர்ந்தவராக இருந்தாலும் குஷ்பு இதனை வரவேற்றிருப்பது பாஜகவுக்கு மகிழ்ச்சியே. மதச்சார்பின்மையை பற்றி பேசுகிறவர்கள், ஒரு மதத்திற்கென்று தனியாக சட்டம் இருப்பதை ஏன் கண்டிக்க மறுக்கின்றனர்?

தமிழகத்தில் ஜல்லிக்கட்டு நடைபெறுவதற்குத் தேவையான அனைத்து விஷயங்களையும் ஆராய்ந்து, வருகின்ற குளிர்காலக் கூட்டத்தொடரில் உரிய நடவடிக்கைகளை மத்திய அரசு மேற்கொள்ளும். வருகின்ற பொங்கல் ஜல்லிக்கட்டு பொங்கலாக தமிழர்களுக்கு கண்டிப்பாக அமையும் என்றார்.

English summary

BJP National Secretary H.Raja welcomed to Congress Spokesperson Kushboo's support to Uniform Civil Code.