ஓமைகாட், 4ஜி பெண்ணை ஏர்டெல்லே கலாய்ச்சு விளம்பரம் போட்டிருக்கே!: பார்த்தீங்களா?
சென்னை: 4ஜி பெண் ஷாஷா சேத்ரியை ஏர்டெல்லே கலாய்ச்சு புதிய விளம்பரங்களை வெளியிட்டுள்ளது.
ஷாஷா சேத்ரி அப்படி என்று யாரிடம் கேட்டாலும் அது யாரு என்று தான் கேட்பார்கள். அட நம்ம 4ஜி பொண்ணுப்பா என்றால் தான் அனைவருக்கும் அடையாளம் தெரியும். அந்த அளவுக்கு ஷாஷா 4ஜி பெண்ணாக பிரபலமாக உள்ளார்.
அவரின் விளம்பரத்தை வைத்து சமூக வலைதளங்களில் பெரியவர்கள் முதல் சிறியவர்கள் வரை பலரும் அவரை கலாய்ச்சுக் கொண்டிருக்கிறார்கள். இந்நிலையில் ஏர்டெல் நிறுவனமே ஷாஷாவை கலாய்ச்சு விளம்பரம் எடுத்து வெளியிட்டுள்ளது.
ஒரு விளம்பரத்தில் ஷிம்லாவுக்கு செல்லும் ஷாஷா இங்கு எவ்வளவு அமைதியாக உள்ளது என்கிறார். அதற்கு அங்குள்ளவர்களோ உன்னுடைய 4ஜி இல்லையல்லவா அது தான் என்று கூறி சிரிக்கிறார்கள். ஷாஷாவோ நான் விடுமுறையில் இருக்கிறேன் என்று கூறிக் கொண்டிருக்கையிலேயே அங்குள்ள ஒருவரின் செல்போனில் 4ஜி வேலை செய்கிறது.
மற்றொரு விளம்பரத்தில் ஷில்லாங்கில் இருக்கும் ஷாஷாவிடம் அவரது நண்பர்கள் டிவியில் எப்பொழுது பார்த்தாலும் ஓவராக பேசுகிறாய் என்கிறார்கள். ஆமாம் கொஞ்சம் ஓவராகிவிட்டது என்கிறார். நீங்கள் இங்கு விடுமுறையில் வந்திருப்பதால் மக்கள் தப்பித்தனர் என்று ஷாஷாவை கலாய்க்கிறார்கள்.