நடிகர் ராஜ்குமார் கடத்தல் வழக்கு: மாதையன் உட்பட 11 பேருக்கு ஜாமீன் நிபந்தனை தளர்வு!

சென்னை: கன்னட நடிகர் ராஜ்குமாரை சந்தனக் கடத்தல் வீரப்பன் கடத்திய வழக்கில் மாதையன் உட்பட 11 பேருக்கான ஜாமீன் நிபந்தனைகளை சென்னை உயர்நீதிமன்றம் தளர்த்தியுள்ளது.

மறைந்த கன்னட நடிகர் ராஜ்குமாரை சந்தன கடத்தல் வீரப்பன் மற்றும் கூட்டாளிகள் 2000-ம் ஆண்டு வனப்பகுதிக்குள் கடத்திச் சென்றனர். ராஜ்குமாரை விடுவிக்கும் முயற்சியின்போது, வீரப்பனுக்கு ரூ.15 கோடி கொடுக்கப்பட்டதாகவும், அந்தப் பணம் வீரப்பனின் அண்ணன் மாதையன் உட்பட 11 பேருக்கு வழங்கப்பட்டதாகவும் கொளத்தூர் போலீசார் வழக்கு பதிவு செய்தனர்.

கோபிசெட்டிபாளையத்தில் உள்ள ஈரோடு மாவட்ட கூடுதல் அமர்வு நீதிமன்றம் இவ்வழக்கை விசாரித்து, வீரப்பனின் அண்ணன் மாதையன் உட்பட 11 பேருக்கு ஓராண்டு சிறை தண்டனை விதித்தது.

இந்த உத்தரவை எதிர்த்து மாதையன் உட்பட 11 பேர் சென்னை உயர் நீதிமன்றத்தில் மேல்முறையீடு செய்தனர். இவ்வழக்கில் மாதையன் உட்பட 11 பேருக்கு கீழ் நீதிமன்றம் விதித்த தண்டனையை நிறுத்திவைத்த உயர்நீதிமன்றம், 11 பேரும் சத்திய மங்கலம் மாஜிஸ்திரேட் நீதிமன்றத்தில் ஒவ்வொரு மாதமும் முதல் வேலை நாளில் ஆஜராக வேண்டும் என்ற நிபந்தனையுடன் ஜாமீன் வழங்கியது.

இந்த நிபந்தனையை தளர்த்தக் கோரி மாதையன் உள்ளிட்டோர் சென்னை உயர்நீதிமன்றத்தில் மனுத் தாக்கல் செய்தனர். உயர்நீதிமன்ற நீதிபதி ஆர்.மாலா இவ்வழக்கை விசாரித்து, மாதையன் உள்ளிட்ட 11 பேரும் மூன்று மாதங்களுக்கு ஒருமுறை சத்தியமங்கலம் நீதிமன்றத்தில் ஆஜராக வேண்டும் என்று ஜாமீன் நிபந்தனையை தளர்த்தி உத்தரவிட்டார்.

English summary

The Madras High Court relaxed bail conditions of forest brigand Veerappan's brother Madhaiyan and nine others in a case of receiving some amount of the ransom after abducting Kannada thespian late Rajkumar in 2000.