தமிழகத்தின் 10 மாவட்டங்களை வாட்டி வதைத்த வெயில் - வீட்டுக்குள்ளேயே முடங்கிய மக்கள்!

சென்னை: தமிழகத்தில் வெயிலின் தாக்கம் இந்த வாரத்தில் 10 மாவட்டங்களில் 100 டிகிரியைத் தாண்டி மக்களை வாட்டி எடுத்துள்ளது.

அதிபட்சமாக தர்மபுரியில் வெயில் 105.44 டிகிரி பதிவானது. சென்னையில் மக்கள் வீடுகளுக்குள்ளே முடங்கியுள்ளனர். இந்தியாவில் பெரும்பாலான மாநிலங்களில் அனல்காற்று வீசி வருகிறது.

குறிப்பாக மத்திய மற்றும் தென்கிழக்கு பகுதிகளில் கடந்த சில நாட்களாக வெயில் 104 டிகிரியை தாண்டி கொளுத்தி வருகிறது.

கடும் அனல் காற்று:

தற்போது மத்திய பிரதேசம், மகாராஷ்டிரா, பீகார், ஜார்கண்ட் போன்ற வடமாநிலங்கள் மற்றும் ஓடிசா, தெலங்கானா, ஆந்திரா, தமிழ்நாடு, புதுச்சேரி, ஆகிய மாநிலங்களில் கடுமையான அனல் காற்று வீசி வருகிறது. தமிழ்நாடு, புதுச்சேரி உள்பட அனல் காற்று வீசும் பகுதிகளில் உள்ள மாநிலங்களில் அடுத்த சில நாட்களுக்கு வெயிலின் கொடுமை அதிகமாக இருக்கும் என்று வானிலை ஆய்வு மையம் எச்சரித்துள்ளது.

மக்களுக்கு எச்சரிக்கை:

தமிழகத்தை பொறுத்தரை கடந்த 2 நாட்களாக வெயிலின் தாக்கம் அதிகமாக இருந்து வருகிறது. இதன் காரணமாக பகல் 12 மணி முதல் மதியம் 3 மணி வரை வெளியில் செல்வதை தவிர்க்க வேண்டும் என்று அந்தந்த மாவட்ட கலெக்டர்கள் மூலமாக பொதுமக்களுக்கு எச்சரிக்கை விடுக்கப்பட்டிருந்தது.

முடங்கிய மக்கள்:

நேற்று தமிழகத்தின் 9 மாவட்டங்களில் வெயில் 100 டிகிரியை தாண்டி கொளுத்தியது. சென்னையில் மதியம் வேளையில் மக்கள் வீடுகளிலேயே முடங்கினர்.

குறைந்து போன நடமாட்டம்:

அது மட்டுமல்லாமல் இன்று சனிக்கிழமை விடுமுறை தினம் என்பதால் வெளியில் செல்வதை தவிர்த்து மக்கள் வீடுகளிலேயே முடங்கினர். நகரின் மையப்பகுதியான அண்ணாசாலையில் மதியம் வேளையில் ஆட்கள் நடமாட்டம் குறைவாக காணப்பட்டது.

வெயில் அளவு:

இன்று காலை நிலவரப்படி தமிழகத்தில் அதிகப்பட்சமாக தர்மபுரியில் 105.44 டிகிரி வெயில் கொளுத்தியது. சேலம் 105.08, கரூர் பரமத்தி 104.9, திருப்பத்தூர் 104, திருச்சி 103.82, பாளையங்கோட்டை 102.74, வேலூர் 102.56, மதுரை ஏர்போர்ட் 102.56, கோயமுத்தூர் ஏர்போர்ட் 101.3, தஞ்சாவூர் 100.4, சென்னை ஏர்போர்ட் 99.32, சென்னை நுங்கம்பாக்கம் 97, கடலூர் 95.72 டிகிரியும் வெயில் வாட்டி எடுத்தது.

English summary

Heat waves beaten up Tamil Nadu's 10 districts with its fire hands, people suffers a lot by heat.