Just In

டோணியின் ஹெலிகாப்டர் ஷாட்டை ரசிச்சு பார்ப்பேன்..ஸ்டாலினின் கிரிக்கெட் ஆர்வம்

By Mayura Akilan

Updated: Sunday, May 8, 2016, 13:45 [IST]

சென்னை: இந்திய கிரிக்கெட் அணியின் கேப்டன் மகேந்திரசிங் டோணியின் ஹெலிகாப்டர் ஷாட்டை தான் ரசிச்சு பார்ப்பேன் என்று திமுக பொருளாளர் மு.க.ஸ்டாலின் கூறியுள்ளார்.

பிரபல அரசியல் தலைவராக... திமுகவின் பொருளாளராக இருந்தாலும் மு.க.ஸ்டாலினுக்கு விளையாட்டின் மீது அதீத ஆர்வம் உண்டு. நமக்கு நாமே பயணம் செல்லும் போதே இளைஞர்களுடன் கால்பந்து, கிரிக்கெட் விளையாடியிருக்கிறார்.

சன்டிவியில் 'ஸ்டாலினிடம் கேளுங்கள்' நிகழ்ச்சியில் பரபரப்பான அரசியல் கேள்விகளுக்கு நடுவே, சினிமா, நடிப்பு, விளையாட்டு ஆர்வம் பற்றி வாக்காளர்கள் சிலர் கேள்வி கேட்டனர்.

நடிப்பில் ஆர்வம்

திரைப்படங்களில் நடித்திருக்கிறீர்களா என்றும், எந்த விளையாட்டு உங்களுக்கு பிடித்தமானது என்றும் கேள்வி எழுப்பினர். அதற்கு பதிலளித்த ஸ்டாலின், அரசியல் கட்சி பிரச்சாரத்திற்காக நாடகங்களில் நடிக்கத் தொடங்கியதாக கூறினார்.
தூர்தர்சனில் சீரியலில் நடித்ததோடு சில திரைப்படங்களில் கவுரவ வேடத்தில் நடித்ததாகவும் கூறினார்.

கிரிக்கெட் பிடிக்கும்

தனக்கு கிரிக்கெட் போட்டி பிடிக்கும் என்று கூறிய ஸ்டாலின், இந்தியா - பாகிஸ்தான் போட்டிகளை விரும்பி பார்ப்பேன் என்று கூறினார்.

சிஎஸ்கே இல்லையே

ஐபிஎல் போட்டிகளில் சிஎஸ்கே விளையாடுவதை ரசித்து பார்ப்பேன் என்று கூறினார். இம்முறை சிஎஸ்கே அணி இல்லை என்பது வருத்தம்தான். ஒருவேளை இருந்திருந்தாலும் தேர்தல் பிரச்சாரத்திற்கு செல்வதால் பார்த்திருக்க முடியாது என்றும் கூறினார்.

ஹெலிகாப்டர் ஷாட்

பிடித்த விளையாட்டு வீரர் யார் என்று கேட்ட கேள்விக்கு பதிலளித்த ஸ்டாலின், டோணியின் விளையாட்டு ரொம்ப பிடிக்கும், அதுவும் அவருடைய ஹெலிகாப்டர் ஷாட் எப்போது வரும் என்று ஆவலுடன் காத்துக்கொண்டிருப்பேன் என்றும் கூறினார்.