எனக்குத் தெரிஞ்சி திமுகதான் நல்ல கட்சி! - கண்டுபிடித்தார் இமான் அண்ணாச்சி!!

By Shankar

Published: Wednesday, March 23, 2016, 8:18 [IST]

சென்னை: எனக்குத் தெரிந்து திமுகதான் நல்ல கட்சி. கருணாநிதிதான் மீண்டும் முதல்வர் என்று அக்கட்சியில் புதிதாய் இணைந்த நடிகர் இமான் அண்ணாச்சி பேசினார்.

சென்னையில் நடந்த திமுக கூட்டத்தில் பங்கேற்ற இமான் பேசுகையில், "நடிகனாகும் ஆசை2யில் நான் தூத்துக்குடியில் இருந்து வந்தேன். நினைச்ச மாதிரியே ஆகிட்டேன்.

சமீபத்தில் சென்னையில் பெருமழை பெய்து வீடுகள் மூழ்கியபோது பாதிக்கப்பட்ட மக்களுக்கு நேரில் சென்று உணவு வழங்கினேன். அப்போது பெருமளவில் தி.மு.க. தொண்டர்களும் உதவி செய்தார்கள்.

மக்கள் பட்ட கஷ்டங்களை அவலங்களையும் வெளிப்படுத்தி ஒரு நல்லாட்சி வருவதற்கு முயற்சிக்க வேண்டும் என்ற ஆசையில்தான் தி.மு.க.வில் சேர்ந்தேன்.

எனக்கு தெரிந்த வரையில் நல்ல கட்சி தி.மு.க.தான். இந்த கட்சியால்தான் மக்களுக்கு நல்லது செய்ய முடியும். சிறு வயதில் இருந்தே எனக்கு தி.மு.க. தலைவர் கலைஞரை பிடிக்கும். தி.மு.க. தான் ஓடுகிற வண்டி, மற்ற கட்சிகள் ஓடாத வண்டி. ஓடுகிற வண்டியான தி.மு.க.வில் நான் ஏறிக்கொண்டேன்.

5 ஆண்டுகளுக்கு முன்பு கருணாநிதி தலைமையில் ஆட்சி நடந்தது. அப்போது ஏராளமான திட்டங்களை நிறைவேற்றி தமிழகத்தை வளமாக்கினார். அடுத்து வந்த அ.தி.மு.க. ஆட்சியில் அந்த திட்டங்கள் இருட்டடிப்பு செய்யப்பட்டன.

இப்போது மக்கள் தெளிவாகி விட்டார்கள். மீண்டும் தி.மு.க.வை ஆட்சியில் அமர்த்த தயாராகி விட்டார்கள். இளைஞர் பட்டாளம் ஏமாந்து விடக்கூடாது. உங்கள் ஓட்டுக்களை வீணாக்கி விடாதீர்கள். கருணாநிதியை முதல்வராக்கினால் மட்டுமே நாட்டுக்கு நல்லது நடக்கும்," என்றார்.