பாரதிதாசன் பல்கலையில் "இண்டர் காலேஜ் திருவிழா" திரளான மாணவர்கள் பங்கேற்பு
திருச்சி: திருச்சி பாரதிதாசன் பல்கலைக் கழகத்தில் நுண்ணுயிரியல் துறை சார்பில் நடைபெற்ற இண்டர் காலேஜ் திருவிழாவில் ஏராளமான மாணவ, மாணவிகள் கலந்து கொண்டனர்.
திருச்சி பாரதிதாசன் பல்கலைக்கழகத்தில் உள்ல நுண்ணுயிரியல் பிரிவில் செனிட்டர்ஸ் என்று அழைக்கப்படும் அறிவியல் சங்கம் இங்குள்ள முதுகலை மற்றும் ஆராய்ச்சி மாணவர்களால் ஆண்டுதோறும் நடத்தப்படுகிறது. இந்தாண்டுக்கான விழா நேற்று முன்தினம் நடைபெற்றது.
இதில் பல்கலைக் கழக உறுப்பு கல்லூரிகளைச் சேர்ந்த சுமார் 250க்கும் மேற்பட்ட மாணவ, மாணவிகள் கலந்துகொண்டனர். மாணவர்களின் அறவியல் திறனை வெளிப்படுத்தும் விதமாக பல்வேறு போட்டிகள் நடத்தப்பட்டன. முதல் இடம் பிடித்த காவேரி கலை மற்றும் அறிவியல் பெண்கள் கல்லூரிக்கு சுழற்கோப்பை வழங்கப்பட்டது.
போட்டிகளில் பங்கேற்று வெற்றி பெற்ற மாணவ, மாணவியர்களுக்கு பரிசுகள் வழங்கப்பட்டன. விழாவில் பாரதிதாசன் பல்கலைக்கழக தேர்வு நெறியாளர் டாக்டர் திருமுருகன், எம்.ஐ.இ.டி. கல்லூரி முன்னாள் முதல்வர் மன்சூர் கலந்து கொண்டு போட்டிகளில் வெற்றி பெற்ற மாணவ, மாணவிகளுக்கு பரிசுகள் வழங்கி பாராட்டினர். விழாவில் நுண்ணுயிரியல் பிரிவு மாணவ, மாணவிகள் உள்பட பலர் கலந்துகொண்டனர்.