ஏற்காடு இடைத்தேர்தல்- நாளை முதல்வர் ஜெயலலிதா பிரசாரம்
சேலம்: ஏற்காடு தொகுதி இடைத்தேர்தலில் அதிமுக வேட்பாளரை ஆதரித்து நாளை முதல்வர் ஜெயலலிதா பிரசாரம் மேற்கொள்கிறார்.
ஏற்காடு தொகுதி இடைத்தேர்தல் வருகிற 4-ந் தேதி நடக்கிறது. இதில் அ.தி.மு.க. வேட்பாளராக சரோஜா போட்டியிடுகிறார். இவர் தொகுதி முழுவதும் தீவிர சுற்றுப்பயணம் செய்து இரட்டை இலை சின்னத்துக்கு வாக்கு சேகரித்து வருகிறார்.
இவருக்கு ஆதரவாக தமிழக அமைச்சர்கள், மற்றும் எம்.பிக்கள், எம்.எல்.ஏக்கள், மேயர்கள், நகராட்சி தலைவர்கள், மற்றும் உள்ளாட்சி அமைப்புகளின் பிரதிநிதிகள், கட்சி நிர்வாகிகள் தீவிரபிரசாரம் செய்து வருகிறார்கள். இவர்கள் கிராமங்களில் முகாமிட்டு வாக்கு சேகரித்து வருகின்றனர்.
இந்நிலையில் அ.தி.மு.க. வேட்பாளர் சரோஜாவை ஆதரித்து பிரசாரம் செய்ய முதல்வர் ஜெயலலிதா நாளை சேலம் வருகிறார். சென்னையில் இருந்து ஹெலிகாப்டர் மூலம் வரும் அவர் உடையாப்பட்டி ஹோலிகிராஸ் பள்ளி மைதானத்தில் வந்து இறங்குகிறார்.
பின்னர் தேர்தல் பிரசார வாகனத்தில் ஜெயலலிதா அங்கு இருந்து புறப்படுகிறார். முதலில் அவர் மின்னாம்பள்ளியில் பேசுகிறார். பின்னர் காரிப்பட்டி, கருமாபுரம், மேட்டுப்பட்டி, எம்.பெருமாபாளையம், டோல்கேட் வழியாக வெள்ளாளக்குண்டம் பிரிவு ரோட்டில் பேசுகிறார்.
அங்கிருந்து காட்டுவேப்பிலைப்பட்டி, முத்தம்பட்டி, வாழப்பாடி பிரிவு வழியாக செல்லும் முதல்வர் ஜெயலலிதா வாழப்பாடி பேருந்து நிலையத்தில் பேசுகிறார். அங்கு பிரசாரத்தை முடித்து விட்டு பேளூர் சாலை பிரிவு, துக்கியம்பாளையம், அத்தனூர்பட்டி வழியாக பேளூர் கருமந்துறை பிரிவு ரோடு எம்.ஜி.ஆர்.சிலை அருகில் பேசுகிறார்.
பின்னர் பள்ளத்தாதனூர், நடுப்பட்டி வழியாக நீர்மூழ்கி குட்டை வருகிறார். அங்கும் வேனில் இருந்தபடியே பிரசாரம் செய்கிறார். தொடர்ந்து ராஜாப்பட்டினம், பூசாரிப்பட்டி வழியாக அனுப்பூர் பிரிவு ரோடு வழியாக கூட்டாத்துப்பட்டிக்கு செல்லும் முதல்வர் வேட்பாளர் சரோஜாவை ஆதரித்து பேசுகிறார்.
பிறகு சர்க்கார் நாட்டார் மங்கலம், செல்லியம்பாளையம், குள்ளம்பட்டி பிரிவு வழியாக வலசையூர் சென்று பிரசாரம் செய்கிறார். பின்னர் ராமர் கோவில் வழியாக செல்லும் ஜெயலலிதா அயோத்தியாப்பட்டணத்தில் பிரசாரம் செய்கிறார். அதையடுத்து உடையாப்பட்டியிலும் பிரசாரம் மேற்கொள்கிறார்.
மின்னாம்பள்ளியில் தனது பிரசாரத்தை தொடங்கும் ஜெயலலிதா உடையாப்பட்டியில் தனது பிரசாரத்தை முடித்து கொள்கிறார். 9 இடங்களில் பிரசாரம் செய்து அ.தி.மு.க. வேட்பாளர் சரோஜாவுக்கு அவர் ஆதரவு திரட்டுகிறார்.
Click it and Unblock the Notifications
Sign in with Google