இதுக்குத் தான் எங்க கமல் அப்பவே சொன்னாரு ‘மேகி’யை சேர்த்துக்காதீங்கனு...
சென்னை : மேகி நூடுல்ஸில் அளவுக்கு அதிகமான ரசாயனப் பொருட்கள் இருப்பதால், அதனை சில மாநிலங்கள் தடை செய்துள்ளன. தமிழகத்திலும் ஆய்வுகள் நடந்து வருகின்றன. விரைவில் தடை விதிக்கப் படும் என எதிர்பார்க்கப் படுகிறது.
இந்நிலையில், இந்த மேகி விவகாரம் நெட்டிசன்களின் வாய்களுக்கு அவலாக வாய்த்துள்ளது. இதனை வைத்து தான் தற்போது அவர்கள் கலாய்த்து வருகிறார்கள்.
அதன்படி, கமல் பஞ்சதந்திரம் படத்தில் பேசும் டயலாக்கை வைத்து ஒரு மீம்ஸ் தயாரித்திருக்கிறார்கள்.
அந்த புகைப்படத்தில் கமல், ரம்யாகிருஷ்ணன், யூகி சேது, ஸ்ரீமன் மற்றும் ஜெயராம் எல்லாம் நிற்க, கூடவே இந்த வசனமும், ‘மேகிய எல்லாம் சேர்த்துக்கவே கூடாதுனு கமல் பஞ்ச தந்திரம்லேயே சொல்லியிருப்பாரு' என கூறப்பட்டுள்ளது.
பொதுவாக உலகில் பரபரப்பைக் கிளப்பக் கூடிய விஷயங்களை முன்னதாகவே தனது படங்களில் கமல் கூறி வருகிறார் என இணையத்தில் ஒரு பேச்சு உள்ளது. அன்பே சிவம் படத்தில் அவர் சுனாமி பற்றி பேசினார், இந்தியாவை சுனாமி தாக்கியது, தசாவதரம் படத்தில் மர்மநோய் குறித்து பேசினார் உலகை எபோலா தாக்கியது என அவர்கள் கூறுவதுண்டு.
அந்தவகையில், பஞ்சதந்திரம் படத்தில் ரம்யாகிருஷ்ணனின் பெயர் மேகி. அப்படத்தில் அவரை தங்கள் கூட்டாளியாகச் சேர்த்துக் கொள்ளவேண்டாம் என கமல் கூறுவதைக் குறிப்பிட்டு இவ்வாறு நெட்டிசன்கள் கலாய்த்து வருகிறார்கள்.