Just In

மனோரமாவின் உடலுக்கு கமல், தனுஷ் நேரில் அஞ்சலி

Updated: Sunday, October 11, 2015, 18:49 [IST]

சென்னை: நடிகை மனோரமாவின் உடலுக்கு நடிகர் கமல், தனுஷ் உள்ளிட்டோர் நேரில் அஞ்சலி செலுத்தினர்.

ஆயிரத்திற்கும் மேற்பட்ட திரைப்படங்களில் நடித்து கின்னஸ் சாதனை புரிந்த நடிகை மனோரமா, உடல் நலக் குறைபாடு காரணமாக நேற்று காலமானார்.

அவரது உடல் தி.நகரில் உள்ள இல்லத்தில் அஞ்சலிக்காக வைக்கப்பட்டுள்ளது. திரைத்துறையினர், அரசியல் கட்சியினர் மற்றும் பொதுமக்கள் மனோரமாவின் உடலுக்கு நேரில் அஞ்சலி செலுத்தி வருகின்றனர்.

நடிகர் கமல் மனோரமாவின் உடலுக்கு நேரில் அஞ்சலி செலுத்தினார். உன்னால் முடியும் தம்பி, அபூர்வ சகோதர்கள் உட்பட பல்வேறு படங்களில் மனோரமாவுடன் கமல் இணைந்து நடித்துள்ளார். கடந்த வாரம் நடைபெற்ற விழா ஒன்றில் கூட கமலும், மனோரமாவும் ஒன்றாக கலந்து கொண்டனர் என்பது குறிப்பிடத்தக்கது.

இதேபோல், நடிகர் தனுஷும், தனது மனைவி ஐஸ்வர்யாவுடன் மனோரமாவின் உடலுக்கு நேரில் அஞ்சலி செலுத்தினார்.

சரத்குமார், ராதிகா, விஷால்:

மனோரமாவின் மறைவு செய்தி கேள்விப்பட்டு விரைந்து வந்த நடிகர் சங்கத் தலைவர் சரத்குமார், ராதிகா ஆகியோர் அவருக்கு அஞ்சலி செலுத்தினர். இரவு முதல் சரத்குமார், விஜயகுமார் உள்ளிட்டோர் மனோரமாவின் உடலுக்கு அருகிலேயே இருந்து இறுதிச் சடங்கிற்கான ஏற்பாடுகளைக் கவனித்துக் கொண்டனர்.

இதேபோல் விஷால், கார்த்தி போன்றோரும் மனோரமாவின் இறுதிச்சடங்கிற்கான ஏற்பாடுகளைச் செய்தனர்.

நடிகர் சங்கத் தேர்தலில் சரத்குமார் அணி, விஷால் அணி என இருவேறு அணியாக களமிறங்கி, ஒருவரையொருவர் தாக்கி சொற்போர் நடத்தி வந்தபோதும், மனோரமாவின் இறுதி அஞ்சலியில் இருதரப்பும் கலந்து கொண்டு அஞ்சலி செலுத்தியது குறிப்பிடத்தக்கது.