காமன்வெல்த் மாநாடு: சட்டப்பேரவையில் தீர்மானம் நிறைவேற்ற கருணாநிதி கோரிக்கை

சென்னை: இலங்கையில் நடைபெறவுள்ள காமன்வெல்த் மாநாட்டில் பிரதமர் கலந்துகொள்ளக்கூடாது என்று தமிழக சட்டசபையில் தீர்மானம் நிறைவேற்ற வேண்டும் என்று கருணாநிதி வேண்டுகோள் விடுத்துள்ளார்.

இது குறித்து அவர் வெளியிட்டுள்ள ஒரு அறிக்கையில்,கூறியுள்ளதாவது: ''இலங்கை தமிழர்கள் மீது சிங்கள அரசு மனிதாபிமானம் சிறிதுமின்றி தொடர்ந்து தாக்குதல் நடத்துவதை எதிர்த்தும், இலங்கை அரசின் போர்க்குற்றங்களையும், மனித உரிமை மீறல்களை சுட்டிக்காட்டியும், 2009 ஆம் ஆண்டு லட்சக்கணக்கான தமிழர்களை இலங்கை கொன்று குவித்து இனப்படுகொலை நடத்தியதை கண்டித்தும், இலங்கையில் நடைபெறும் காமன்வெல்த் மாநாட்டில் இந்தியா சார்பில் யாரும் கலந்து கொள்ளக்கூடாது என்று "டெசோ" இயக்கத்தின் மூலமாக பேரழுத்தம் கொடுத்திடும் வகையில் கடுமையாகவே தெரிவித்திருக்கிறோம்.

நம்மைப்போலவே தமிழகத்திலே வேறு சில முக்கியமான கட்சிகளும், மாணவர் இயக்கங்களும், குறிப்பாக விடுதலை சிறுத்தைகள் கட்சி தலைவர் தொல்.திருமாவளவன் 15-10-2013 அன்றும், பா.ம.க. நிறுவனர் டாக்டர் ராமதாஸ் 16-10-2013 அன்றும், திராவிடர் கழக தலைவர் கி.வீரமணி விடுத்த அறிக்கைகளில், "இலங்கையில் நடைபெறும் மாநாட்டில் இந்தியா கலந்து கொள்ளக்கூடாது" என்றும், அந்த மாநாட்டினை இந்தியா புறக்கணிக்க வேண்டுமென்றும் வலியுறுத்தி இருக்கிறார்கள்.

தமிழக அரசின் சார்பிலும் 18-10-2013 அன்று முதலமைச்சர், இந்திய பிரதமருக்கு இதே வேண்டுகோளை கடிதத்தின் மூலம் தெரிவித்திருக்கிறார். ஏன் அதற்கு முன்பே 25-3-2013 அன்றும் பிரதமருக்கு தமிழக முதலமைச்சர் கொழும்பில் நடைபெறவிருக்கும் காமன்வெல்த் மாநாட்டை புறக்கணிக்க வேண்டும் என்று வலியுறுத்தியிருந்தார்.

English summary

DMK chief Karunanithi Karunanidhi said that TN assembly resolution pass to PM boycott in Commonwealth meet in Sri Lanka