நவ. 7- ஸ்டாலின் எழுச்சிப் பயணத் தொடக்க விழாவில் கருணாநிதி பங்கேற்பு?

ஸ்டாலின் எழுச்சிப் பயணத் தொடக்க விழாவில் திமுக தலைவர் கருணாநிதி பங்கேற்க உள்ளதாக தகவல்கள் வெளியாகி உள்ளன.

சென்னை: திமுக செயல் தலைவர் மு.க.ஸ்டாலின் நவம்பர் 7-ந் தேதி தொடங்க இருக்கும் எழுச்சிப் பயணத்தின் தொடக்க விழாவிலும் அக்கட்சித் தலைவர் கருணாநிதி பங்கேற்பார் என கூறப்படுகிறது.

ஓராண்டாக உடல்நலக் குறைவால் பொதுநிகழ்ச்சிகளில் கருணாநிதி பங்கேற்காமல் இருந்தார். அவ்வப்போது புகைப்படங்கள், வீடியோக்கள் வெளியிடப்பட்டு வந்தன.

இந்நிலையில் கடந்த வாரம் திடீரென முரசொலி அலுவலகத்துக்கு கருணாநிதி அழைத்து வரப்பட்டார். அங்கு 40 நிமிட நேரம் முரசொலி பவள விழா கண்காட்சி அரங்கு, முரசொலி மாறன் சிலை ஆகியவற்றை பார்த்தார்.

பின்னர் புன்னகை சிரிப்போடு கருணாநிதி, கோபாலபுரம் இல்லம் சென்றார். அப்போது அவரது மருத்துவர், ஓரிரு நாளில் மற்றொரு அதிசயம் நடைபெறும் எனவும் கூறியிருந்தார். இதனால் கருணாநிதி விரைவில் பேசுவார் என எதிர்பார்க்கப்பட்டு வருகிறது.

இந்நிலையில் ஸ்டாலின், தமிழகம் முழுவதும் எழுச்சிப் பயணம் மேற்கொள்ள இருக்கிறார். நவம்பர் 7-ந் தேதியன்று ஸ்டாலினின் எழுச்சிப் பயணத்தை மேற்கு வங்க முதல்வரும் திரிணாமுல் காங்கிரஸ் தலைவருமான மமதா பானர்ஜி தொடங்கி வைக்கிறார்.

இந்நிகழ்ச்சியிலும் திமுக தலைவர் கருணாநிதி பங்கேற்க உள்ளதாக அக்கட்சி வட்டாரங்கள் தெரிவிக்கின்றன. இது திமுக தொண்டர்களை மிகுந்த உற்சாகத்தில் திளைக்க வைத்துள்ளது.

English summary

Sources said that DMK President Karunanidhi will attend his son and party working presiden MK Stalin's state wide tour inauguration function